पणजी : गोव्‍याच्‍या घटकराज्‍य दिनाचे औचित्‍य साधून दि. 30 मे रोजी नवीन राजभवनच्‍या इमारतीचा पायाभरणी सोहळा होणार आहे. यावेळी राष्ट्रपती रामनाथ कोविंद यांची प्रमुख उपस्‍थिती राहिल. सोहळ्यात आतापर्यंतच्या सर्व मुख्यमंत्र्यांसह राज्‍यातील विविध क्षेत्रात उल्लेखनीय कामगिरी केलल्‍या 30 मान्‍यवरांचा सत्‍कार करण्यात येणार असल्‍याची माहिती मुख्यमंत्री डॉ. प्रमोद सावंत यांनी दिली.

मुख्यमंत्र्यांच्‍या पणजी येथील सरकारी निवासस्‍थानी आयोजित पत्रकार परिषदेत ते बोलत होते. राजभवनच्‍या परिसरात ही भव्‍य वास्‍तू उभारण्यात येणार आहे. नवीन राजभवनचे बांधकाम पूर्ण झाल्‍यानंतर सध्याचे राजभवन जनतेला पाहण्यासाठी खुले ठेवण्यात येणार असल्‍याचे ते म्हणाले. तसेच उटा संघटनेच्‍या बाळ्ळी येथील आंदोलनात बळी गेलेले मंगेश गावकर आणि दिलीप वेळीप या तरुणांना आदरांजली वाहण्यासाठी आदिवासी कल्याण संचालनालयाच्‍या वतीने दि. 25 मे रोजी प्रेरणा दिन साजरा करण्यात येणार आहे. यानिमित्त शिक्षण, संस्‍कृती, क्रीडा आणि कृषी क्षेत्रात काम केलेल्‍या आदिवासी समाजातील चौघांना गौरविण्यात येईल असे मुख्यमंत्री सावंत यांनी सांगितले.

25 मे रोजी प्रेरणा दिनानिमित्त कृषी क्षेत्रातील रोहिदास मडकईकर, सातू वेळीप (शिक्षण), गोविंद शिरोडकर (संस्‍कृती) व प्रतिक्षा गावकर (क्रीडा) यांना आदिवासी प्रज्ञावंत पुरस्‍काराने सन्मानित केले जाणार आहे. पणजीतील मिनेझिस ब्रांगाझा सभागृहात सकाळी 10.30 वाजता हा कार्यक्रम होईल. मुख्यमंत्री प्रमोद सावंत, सभापती रमेश तवडकर, क्रीडामंत्री गोविंद गावडे आदी मान्‍यवर उपस्‍थित राहतील.