मडगाव : मडगाव येथील कोकण रेल्वे उड्डाणपुलाच्या दुरुस्ती कामास सुरुवात करण्यात आली आहे. हा उड्डाणपूल बांधून जवळ जवळ दोन दशके पूर्ण झाली असली तरी त्याची दुरुस्ती करण्यात आली नव्हती. पण आता उड्डाण पुलाची दुरुस्ती करण्याची मागणी होत होती. दुरुस्ती कामास सुरुवात झाली असली तरीही पूल वाहतुकीस पुर्णपणे बंद करण्यात आलेला नाही. पुलावरुन एकेरी वाहतूक सुरु असून एका बाजूने वाहनांना जाण्याची परवानगी देण्यात आली आहे. (Railway Flyover in Madgaon News Updates)

उड्डाणपुलाच्या दुरुस्ती (Repair) कामामुळे मडगाव शहरात वाहतुकीचा खोळंबा लोकांना काही दिवस त्रासदायक ठरण्याची शक्यता आहे. पुलावरील जे रबर जोड निकामी झाले आहेत, ते बदलण्याचे काम सर्वात आधी हातात घेतले जाईल, शिवाय रस्त्याचे डांबरीकरणही होणार आहे. दुरुस्ती काम मार्च अखेरपर्यंत पूर्ण होण्याची शक्यता आहे आणि 31 मार्चपासून वाहतूक (Traffic) पूर्णपणे उड्डाणपुलावरुन सुरळीत सुरु केली जाईल.

पुलाच्या दुरुस्तीचे काम केंद्रीय सार्वजनिक बांधकाम खात्यामार्फत करण्यात येत असून या उड्डाणपुलाव्यतिरिक्त माशे आणि अर्दफोंड येथील उड्डाणपुलांचीही दुरुस्ती केली जाणार आहे. या कामासाठी खात्याने 5.99 कोटी रुपयाचे अंदाजपत्रक तयार केले आहे. गेल्या काही वर्षांपासून या उड्डाणपुलाचे दुरुस्तीचे काम अपेक्षित होते. रस्त्याखालील स्टील आणि लोखंडाचे गज, सळई वर आले होते. वाहनांसाठी ते धोकादायक ठरत होते. रात्रीच्या वेळी रस्त्यावरील (Road) दिवेही कधी कधी बंद असत, त्यावेळी चालकांना तसेच पुलावरुन चालणाऱ्यांना त्रास होत होता. काही वर्षांपूर्वी या उड्डाणपुलावर काही प्रमाणात दुरुस्ती करण्यात आली होती. तरी ती अपुरी होती. 31 मार्च पर्यंत काम पुर्ण केले जाईल यांत रंगरंगोटीचा समावेश असेल असे तेथील अधिकाऱ्याने सांगितले.