मुंबई: होळी व उन्हाळी हंगामाच्या पार्श्वभूमीवर रेल्वे प्रवाशांची वाढती गर्दी लक्षात घेऊन मध्य रेल्वेने ३४ विशेष गाड्यांच्या सेवेला मुदतवाढ दिली आहे. त्यामुळे होळीनिमित्त बाहेरगावी जाणाऱ्या लांब पल्ल्याच्या प्रवाशांना दिलासा मिळणार आहे. या गाड्यांचे आरक्षण आजपासून (ता. १६) सुरू झाले आहे.

रेल्वे प्रशासनाने दिलेल्या माहितीनुसार, ट्रेन क्रमांक ०४७१५ बिकानेर-साईनगर शिर्डी साप्ताहिक विशेष गाडी २८ फेब्रुवारीपर्यंत अधिसूचित होती; ती आता २८ मार्चपर्यंत दर शनिवारी धावणार आहे. परतीची ट्रेन क्रमांक ०४७१६ साईनगर शिर्डी-बिकानेर विशेष १ मार्चऐवजी २९ मार्चपर्यंत दर रविवारी चालवण्यात येईल.

ट्रेन क्रमांक ०४७२५ हिसार-खडकी साप्ताहिक विशेष २२ फेब्रुवारीपर्यंत नियोजित होती. ती आता २९ मार्चपर्यंत दररविवारी धावेल. ट्रेन क्रमांक ०४७२६ खडकी-हिसार विशेष २३ फेब्रुवारीऐवजी ३० मार्चपर्यंत दर सोमवारी चालवली जाईल. ट्रेन क्रमांक ०९६२५ अजमेर-दौंड साप्ताहिक विशेष २६ फेब्रुवारीऐवजी २६ मार्चपर्यंत दर गुरुवारी धावेल, तर ट्रेन क्रमांक ०९६२६ दौंड-अजमेर विशेष २७ मार्चपर्यंत दर शुक्रवारी वाढवण्यात आली आहे.

ट्रेन क्रमांक ०९६२७ अजमेर-सोलापूर विशेष २५ फेब्रुवारीऐवजी २५ मार्चपर्यंत दर बुधवारी धावेल. ट्रेन क्रमांक ०९६२८ सोलापूर-अजमेर विशेष २६ मार्चपर्यंत दर गुरुवारी चालवण्यात येणार आहे. रेल्वेने स्पष्ट केले की, या सर्व गाड्यांचे वेळापत्रक, मार्ग, थांबे व रचना यामध्ये कोणताही बदल करण्यात आलेला नाही.