हरमल: केरी-तेरेखोल पंचायत क्षेत्रातील श्री आजोबा देवस्थानाच्या मागील घनदाट जंगलासह परिसरात रात्रीच्या वेळी शिकाऱ्यांचा वावर वाढल्याचा संशय व्यक्त होत आहे. महाराष्ट्रातून येणारे शिकारी या भागात फिरत असल्याचे स्थानिकांचे म्हणणे असून, वन्यप्राण्यांच्या शिकारीसाठी स्फोटकांचा वापर होत असल्याच्या शक्यतेने ग्रामस्थांमध्ये भीतीचे वातावरण आहे.

गेल्या आठवड्यात एका कुत्र्याच्या जबड्याला गंभीर दुखापत झाल्याची घटना उघडकीस आली. त्याच्या जबड्याला झालेली दुखापत पाहता, शिकारीसाठी ठेवलेल्या स्फोटकाचा स्फोट झाला असावा, असा संशय व्यक्त केला जात आहे. या प्रकारामुळे जंगलात लाकडे गोळा करण्यासाठी किंवा अन्य कामांसाठी जाणाऱ्या नागरिकांच्या सुरक्षिततेचा प्रश्न निर्माण झाला आहे.

स्फोटकांच्या वापराची पूर्वीही घटना

सुमारे १० ते १२ वर्षांपूर्वी पालये-केरी पठारावर एका कुत्र्याच्या तोंडात सुतळी बॉम्ब फुटल्याने त्याचा मृत्यू झाला होता. रानडुकरांची शिकार करण्यासाठी असे स्फोटक ठेवले जात असल्याची चर्चा त्या वेळी होती.

वन्यप्राण्यांची शिकार करणे हा गंभीर गुन्हा असून, स्फोटकांचा वापर माणसांच्या जीवितालाही धोका निर्माण करू शकतो. त्यामुळे वन खात्याने आणि संबंधित यंत्रणांनी या भागात विशेष मोहीम राबवून शिकाऱ्यांचा शोध घ्यावा, जंगलात गस्त वाढवावी आणि दोषींवर कठोर कारवाई करावी, अशी मागणी स्थानिक नागरिकांनी केली आहे.