वाळपई: सत्तरीतील केरी चेकपोस्टवर बेळगावहून मडगाव येथे बेकायदेशीर पद्धतीने गोमांस वाहतूक करणारा टेम्पो ग्रामस्थांनी पोलिसांच्या मदतीने पकडला.

वाहन कर्नाटक पासिंग (केए-२२ एए-६३८९) असून त्यात सुमारे २००० किलोपेक्षा अधिक निकृष्ट दर्जाचे व अस्वच्छ गोमांस सापडले. पोलिसांनी वाहनचालकाला अटक करून पुढील तपास सुरू केला आहे. राज्यातील गेल्या दोन दिवसांतील ही तिसरी घटना असल्याने मोठी खळबळ उडाली आहे.

प्राप्त माहितीनुसार, काही गोप्रेमी व बजरंग दलाचे कार्यकर्त्यांनी सोमवारी दुपारी केरी पोलिस चेकपोस्टवर हा टेम्पो पकडला. वाहन तपासणीदरम्यान उघड्यावर ठेवलेले, दुर्गंधीयुक्त मांस आढळले. वाहनचालक दारूच्या नशेत असल्याचे उघड झाले असून, चौकशीदरम्यान त्याने कोणतीही कागदपत्रे सादर केली नाहीत.

तेच वाहन पुन्हा पकडले!

पोलिसांनी बेळगाव येथील मन्झूर मन्सूर शेख (रा. बेळगाव) याला टेम्पोसहित अटक केली आहे. या घटनेपूर्वी आठ दिवसांपूर्वी याच वाहनातून मोर्ले येथे दोन टन गोमांस जप्त करण्यात आले होते, तर रविवारी पहाटे ४०० किलो गोमांस घेऊन जाणारी इनोव्हा कार व दुपारी मोर्ले येथे ८०० किलो मास जप्त झाले होते.