केपे: केपे येथील पोप जॉन विद्यालयाजवळ असलेल्या कालव्यात एक गाय पडली होती. गेले दोन दिवस ती पाण्यातून बाहेर येण्यासाठी धडपडत होती. या घटनेविषयी संबंधित खात्याच्या अधिकाऱ्यांना सांगूनही कुणीच गाईला बाहेर काढण्याचे प्रयत्न केले नाहीत. अखेर आज याविषयी कुडचडे येथील युवकांना माहिती मिळताच त्यांनी केपे येथे धाव घेऊन गाईला पाण्याबाहेर काढले.

केपे येथील हा कालवा पाण्याने भरून वाहत आहे. कालव्याच्या शेजारी वासरांना चरण्यासाठी बरेच गवत उपलब्ध असल्याने केपे भागातील गुरे या ठिकाणी चरण्यासाठी येतात. मात्र, चारा असलेल्या ठिकाणाजवळच हा कालवा असल्याने काहीवेळा गुरे घसरून या कालव्यात पडतात, असे लोकांनी सांगितले.

गेले दोन दिवस पाण्यात पडलेली एक गाय आपला जीव वाचवण्यासाठी धडपड करीत होती व या गाईला वाचवण्यासाठी कोणीच पुढे आले नसल्याने कुडचडे येथील युवकांनी नाराजी व्यक्त केली.