म्हापसा: नो-पार्किंगमध्ये गाडी उभी केल्याने काही दिवसांपूर्वी कळंगुट वाहतूक पोलिस व स्थानिक पंचायतीने संयुक्त कारवाई करीत, पुणे-महाराष्ट्रमधील एका पर्यटकाला चलन देण्यात आले होते. या कारवाईविरोधात त्या पर्यटकाने सोशल मीडियावर व्हिडिओ पोस्ट करीत टीका केली होती. तसेच कळंगुट पंचायतीवर आक्षेप नोंदवून पर्यटकांची पंचायतीकडून लूट सुरू आहे, असा दावा केला होता. मात्र, पर्यटकाचे हे आरोप पंचायतीने फेटाळले होते.

यासंदर्भात कळंगुट पंचायतीने नंतर पोलिसांत वरील पर्यटकविरोधात लेखी तक्रार दिली होती. याची दखल घेत पर्यटक नीलेश निकम यांनी आपला नवा व्हिडिओ शनिवारी (दि.२३) जारी करीत, आपण येत्या सोमवारी पुन्हा गोव्यात येणार आणि वरील तक्रारीला उत्तर देणार, असे म्हटले आहे.

कळंगुट पंचायत पर्यटकांची लूट करत आहे, असे म्हटल्याने सरपंच यांचा इगो दुखावला गेला आहे, असेही निकम यांनी नवीन व्हिडिओत म्हटले आहे. दरम्यान, कळंगुटचे सरपंच जोसेफ सिक्वेरा यांनी वरील पर्यटकावर झालेली कारवाई ही कायद्याच्या चौकटीत झाली असल्याचे यापूर्वीच स्पष्ट केले आहे. दरम्यान, व्हिडिओ बनवून मला गोव्याच्या पर्यटनाला लक्ष्य करायचे नव्हते, असे निकम यांनी म्हटले. मी केवळ सत्यस्थितीवर भाष्य केल्याचा दावा निकम यांनी पुढे व्हिडिओत केला आहे.

काही दिवसांपूर्वी एका पर्यटकाने आधी नो-पार्किंगमध्ये गाडी उभी करून नंतर ड्युटीवरील वाहतूक पोलिसांनाच प्रश्न करीत, पराचा कावळा केला होता. ज्यावेळी हा प्रकार घडला तेव्हा वाहतूक पोलीस अधिकाऱ्यांनी ठोस स्पष्टीकरण दिले नसल्याने किंवा गप्प राहणे पसंत केल्याने लोकांमध्ये देखील संभ्रम जास्त पसरला.

कळंगुट पंचायत कार्यक्षेत्रात बुधवारी महाराष्ट्रातील एका पर्यटकाने रेंट-अ-बाईक ही नो-पार्किंग क्षेत्रात उभी केल्याने, त्याला वाहतूक पोलिसांनी कुलूप लावल्याने मोठा वादंग निर्माण झाला. पोलिस व पंचायतीकडून दंडाच्या नावाने पर्यटकांची सतावणूक सुरू असल्याचा दावा करीत, या पर्यटकाने व्हिडिओ बनविला आणि तो व्हायरल झाला.