Goa News: कळंगुट येथील घराच्या मालमत्तेवरून फ्रेंच अभिनेत्री मारियाने बोर्गो हिने बंदिवासात ठेवल्याप्रकरणीचा दावा केला होता. याप्रकरणी कळंगुट पोलिसांनी केलेल्या चौकशीत त्यात तथ्य नसून मालमत्तेवरून बोर्गो व नेपाळी महिलेमध्ये वाद सुरू आहे.

पोलिसांनी बंदीवासाचा दावा फेटाळून लावला आहे. बोर्गो हिने सुरक्षेसाठी काही सुरक्षा रक्षकाची नियुक्ती केली आहे तर तिला या घरातून बाहेर काढण्यासाठी नेपाळी महिलेने काही बाऊन्सरची मदत घेतली आहे. हे प्रकरण सध्या न्यायालयात न्यायप्रविष्ट आहे, अशी माहिती वरिष्ठ अधिकाऱ्यांनी दिली.

फ्रेंच अभिनेत्री असलेल्या महिलेने उच्च न्यायालयात या घराच्या मालमत्तेसंदर्भात अर्ज केला होता. मात्र, उच्च न्यायालयाने त्यामध्ये हस्तक्षेप करण्यास नकार दिला व नागरी न्यायालयात दाद मागण्याचा सल्ला दिला होता. बोर्गो हिने तिला बंदिवासात ठेवल्याची तक्रार केल्यानंतर पोलिसांनी त्या ठिकाणी जाऊन चौकशी केली. मात्र त्यात काहीच तथ्य नव्हते.

तेव्हाच समजेल मालमत्तेचा खरा मालक

सध्या कळंगुट येथे ज्या घरामध्ये ही फ्रेंच महिला राहते, त्या घराच्या खरेदीसाठी तिने पैसे मोजल्याचे पोलिसांना सांगितले. तर नेपाळी महिलेने केलेल्या दाव्यामध्ये ती या मालमत्तेच्या मूळ मालकाची पत्नी आहे. तिच्या पतीचे निधन झाले आहे.

त्यामुळे आता हा मालमत्तेचा प्रश्‍न सध्या न्यायालयात प्रलंबित आहे. न्यायालयातील निर्णयानंतरच या मालमत्तेचा खरा मालक समजेल, अशी माहिती पोलिसांनी दिली.