Goa Illegal Shacks : गोवा राज्य प्रदूषण नियंत्रण मंडळाची मान्यता नसलेली कांदोळी, कळंगुट किनाऱ्यावरील शॅक्स सील करण्याची कारवाई सुरु करण्यात आली आहे. या कारवाईसाठी उत्तर गोवा जिल्हाधिकाऱ्यांनी एकूण 9 पथकांची नियुक्ती केली आहे. याबाबत उच्च न्यायालयाने आदेश दिले होते. दरम्यान या कारवाईमुळे शॅक्स चालक, मालकांचे धाबे दणाणले आहेत.

कांदोळी, कळंगुट समुद्रकिनारी 161 शॅक्स 'कन्सेंट टू ऑपरेट' हा मंडळाचा परवाना नसताना चालू असल्याची माहिती महामंडळातर्फे उच्च न्यायालयासमोर एका जनहित याचिकेच्या सुनावणीवेळी सादर केली होती तसेच ते शॅक्स चालू असल्याचेही मंडळाने न्यायालयाच्या निदर्शनास आणले होते. त्यानंतर न्यायालयाने हे शॅक्स बंद करण्याचे निर्देश उत्तर गोवा जिल्हाधिकाऱ्यांना दिले होते.

या आदेशाची अंमलबजावणी करण्यासाठी आज उत्तर गोवा जिल्हाधिकाऱ्यांनी कारवाईची मोहीम सुरु केली. यात ज्यांच्याकडे मंडळाचा परवाना नाही ते शॅक्स बंद करण्यात येत आहेत.

दरम्यान शॅक्स चालवण्यासाठी गोवा प्रदूषण मंडळाची परवानगी आवश्यक आहे. या परवानगीसाठी शॅक्स चालक मालकांनी धाव घेतली असून अर्ज केले आहेत. कारवाई करणाऱ्या पथकांमध्ये मामलेदार, उपजिल्हाधिकारी, पोलीस व त्यांचे कर्मचारी यांचा समावेश करण्यात आला आहे.

समुद्रकिनारी शांतता क्षेत्रात संगीत वाजवण्यास बंदी आहे. तसेच मोरजी व मांद्रे येथील किनारी भागात कासव संवर्धन क्षेत्रही अधिसूचित केले असताना संबंधित यंत्रणा त्याकडे डोळेझाक करत असल्याने मागील सुनावणीवेळी उच्च न्यायालयाने याबाबत नाराजी व्यक्त केली होती. शॅक्स वा आस्थापनांच्या परवान्यांची तपासणीही केली जात नसल्याने सरकारी यंत्रणांच्या कार्यपद्धतीवर खंडपीठाने बोट ठेवले होते.