Prime Minister Narendra Modi: गोवा सरकारच्या वतीने अक्षय ऊर्जेच्या बाबतीत केले जाणारे प्रयत्न राज्याच्या शाश्‍वत हितासाठी प्रेरक आणि चालना देणारे ठरतील, असा विश्‍वास पंतप्रधान नरेंद्र मोदी यांनी ट्विट करून व्यक्त केला आहे. त्यांनी सरकारच्या या प्रयत्नांचे कौतुक केले आहे.

मुख्यमंत्री डॉ. प्रमोद सावंत यांनी राज्यात अक्षय ऊर्जेला दिल्या जाणाऱ्या प्रोत्साहनाचा व्हिडिओ ‘ट्विटर’वर अपलोड केला होता. या ट्विटला पंतप्रधानांनी रिट्विट करत सरकारच्या प्रयत्नांचे कौतुक करत प्रोत्साहन दिले आहे.

गोवा एनर्जी डेव्हलपमेंट एजन्सी आणि नवीन आणि नवीकरणीय ऊर्जा विभाग आणि वीज विभाग यांच्या संयुक्त प्रयत्नांनी गोव्याला शाश्वत विकासाच्या मार्गाची वाट मोकळी करण्यात आली आहे, असे पंतप्रधान नरेंद्र मोदी यांनी सांगितले.

मुख्यमंत्री प्रमोद सावंत यांच्या ट्विटला उत्तर देताना पंतप्रधान म्हणाले की, “गोव्याला सौरउर्जेचा उपयोग करताना पाहून आनंद झाला. हा सहयोगी प्रयत्न शाश्वत विकासाला चालना देईल.”

सावंत म्हणाले, “राज्यभर सौरऊर्जेवर आधारित घरे स्थापन करण्याच्या दृष्टीकोनातून गोवा सरकार पंतप्रधान मोदींनी ठरवलेल्या परिवर्तनाच्या मार्गावर चालत आहे.

या प्रयत्नातून राज्य हरित आणि अधिक शाश्वत भविष्याकडे लक्षणीय प्रगती करत असल्याचा विश्वास मुख्यमंत्री प्रमोद सावंत यांनी व्यक्त केला.