Pre-Monsoon Work in Mapusa: राज्यात सध्या मॉन्सूनपूर्व कामे सुरू असून पावसाळा जवळ आला तरी ही कामे पूर्ण झाली नसल्याचे चित्र आहे. दरम्यान आपापल्या भागातील कामे लवकरात लवकर पूर्ण होण्यासाठी संबंधित लोकप्रतिनिधी प्रयत्नशील आहेत. उपसभापती आणि म्हापसाचे आमदार जोशुआ डिसोझा यांनी म्हापशातील कामांचा आढावा घेतला.

यावेळी जोशुआ यांच्यासोबत WRDचे सहाय्यक अभियंता सुदेश परुळेकर, नगराध्यक्षा प्रिया मिशाळ, प्रशांत नार्वेकर, सुभा आमोणकर, संगीता सातार्डेकर, शुभांगी वायंगणकर इ. मान्यवर उपस्थित होते.

आमदार जोशुआ डिसोझा यांनी म्हापसामधील मॉन्सूनपूर्व कामे आणि नाल्यांची पाहणी करत सुरू असलेल्या कामांचा आढावा घेतला. तसेच या कामांबाबत संबंधित अधिकाऱ्यांना सूचना केले असल्याचे जोशुआ यांनी सांगितले.

तसेच, सार्वजनिक बांधकाममंत्री नीलेश काब्राल यांनी सुरू असलेली कामे या आठवड्यात सुव्यवस्थित करण्यात येणार असल्याचे आश्वासन दिले आहे, अशी माहिती यावेळी जोशुआ यांनी दिली.

दरम्यान, म्हापसा-गिरी रस्त्यावर काही दिवसांपूर्वी याच रस्त्यावर मोठे भगदाड पडले होते. मात्र त्याचे काम अद्याप पूर्ण झाले नसल्याचे मत नागरिकांनी व्यक्त केले आहे. त्यामुळे रस्त्याची दुर्दशा झाली असून वाहनचालकांना जीव मुठीत घेऊन या रस्त्यावरून प्रवास करावा लागत आहे. याकडे सरकार आणि सार्वजनिक बांधकाम विभागाने लक्ष केंद्रित करावे अशी मागणी स्थानिकांनी केली आहे.