Cashew Harvest Season

वाळपई: सत्तरी तालुक्यात सध्‍या काजू उत्पादन घेणारे बागायतदार काजू बागायतीत वाढलेले नैसर्गिक तण म्हणजेच काजू बेणणी करण्याच्‍या कामात व्‍यस्‍त आहेत.

साधारणत: तुळशीविवाहानंतर लोकांना काजू पीक हंगामाचे वेध लागतात. फेब्रुवारी-मार्चपासून काजू हंगामाला सुरवात होत असते. पण त्याआधी बागायतीत मोठ्या प्रमाणात वाढलेले तण काढणे आवश्यक असते.

हे तण काढले तरच काजू हंगामात जागेत फिरून बोंडू गोळा करण्यास मिळतात. सत्तरी तालुक्यात काजू पीक बागायतदार वर्गाचे अत्यंत महत्त्‍वाचे पीक आहे. येथील काजू बियांना चांगली चव आहे. पण ती चव प्राप्त करायची असेल तर गावठी काजूंची लागवड करणे गरजेचे आहे. हे करत असताना काजू पीक व्यवस्थापन महत्त्‍वाचे असते.

त्यातील आणखी एक महत्त्‍वाचा भाग म्हणजे तणांवर नियंत्रण करणे. मात्र ते व्यवस्थापन करत असताना सध्‍याच्या घडीला काजू बागायतदारांना खूप अडचणी येत आहेत. काजू हंगाम मार्च ते मे महिन्यापर्यंत असतो. साधारणत: मार्च महिन्यापासून काजू बियांचे उत्पादन मिळण्यास सुरू होते. पण त्याआधी काजू बागायतीत वाढलेले नैसर्गिक मोठे झालेले तण काढणे आवश्यक असते. ती कामे सध्‍या सुरु आहेत.

कामगार मिळेनात, रोजंदारीही वाढली!

या कामासाठी स्थानिक कामगार कमी प्रमाणात मिळतात. नवीन पिढी अशी कामे करण्यास रस दाखवत नाही. त्‍यामुळे मोठी समस्‍या निर्माण झाली आहे. प्रसंगी शेजारच्‍या कर्नाटक, महाराष्ट्र राज्यातून कामगार आणावे लागतात. त्‍यांना चांगला रोजगार द्यावा लागतो. त्यामुळे बेणकटीची कामे ही बागायतदारांच्या अंगलट आलेली आहेत. गेल्या अनेक वर्षांपासून ही स्थिती बनलेली आहे. परिणामी दरवर्षी काजू बागायतदारांना तोटाच सहन करावा लागतो. पण तरीही काजू बागायतीतील उत्पादन सुरळीत राहण्यासाठी दरवर्षी बागायतदारांना बेणकटीची कामे करावी लागतातच. सध्‍याच्या घडीला रोजंदारी ५०० ते ७०० रुपयांपर्यंत गेलेली आहे.