Vegetables In Goa: राज्‍यात कांदा, बटाटा तसेच इतर भाजी शेजारच्‍या राज्‍यांतून आयात केली जाते. उतप्रदेशात बटाट्याचे उत्‍पादन मोठ्या प्रमाणात घेतले जाते. गोव्यातील जनतेला उत्तम दर्जाचा बटाटा आणि तोही वाजवी दरात मिळावा यासाठी गोवा फलोत्पादन महामंडळ प्रयत्नशील आहे, असे महामंडळाचे अध्यक्ष आमदार प्रेमेंद्र शेट यांनी सांगितले.

उत्तरप्रदेश फलोत्पादन महामंडळ आणि गोवा फलोत्पादन महामंडळाच्या संयुक्त विद्यमाने आयोजित बटाटा व्यापारी उत्‍पादक मेळाव्यात प्रेमेंद्र शेट बोलत होते. यावेळी व्यवस्थापक चंद्रहास देसाई, कृषी संचालक नेविल आल्फोन्सो, माजी आमदार प्रकाश वेळीप, उत्तरप्रदेश फलोत्पादन महामंडळ व्यवस्थापक अंजनी कुमार श्रीवास्तव आदी मान्‍यवरांची उपस्थिती होती.

देशातील सर्वाधिक बटाट्याचे उत्पादन उत्तरप्रदेशात घेतले जाते. हा बटाटा गोव्यातही विकला जावा यासाठी आम्ही प्रयत्नरत आहोत. त्‍यासाठी आम्‍ही शेतकऱ्यांसह येथे आलो आहोत.

गुणवत्ता, उत्पादन आणि वाजवी दरामुळे हा बटाटा येथील व्यापारांना आवडेल. कारण त्‍यात दलाल किंवा मध्यस्थी नसतील. याकामी आम्हाला गोवा सरकार, कृषी विभाग, फलोत्पादन महामंडळाचे उत्तम सहकार्य लाभत असल्याचे उत्तरप्रदेश फलोत्पादन महामंडळ व्यवस्थापक अंजनी कुमार श्रीवास्तव यांनी सांगितले.

गोवा फलोत्पादन महामंडळाकडून दरदिवशी २५ हजार किलो बटाटा विकला जातो. आम्ही मोठ्या प्रमाणात तो बेळगाव येथून आणतो. परंतु उत्तरप्रदेशातून उत्तम गुणवत्ता आणि वाजवी दरात बटाटा मिळल्यास त्‍याबाबत नक्कीच विचार केला जाईल. - चंद्रहास देसाई, संचालक (गोवा फलोत्पादन महामंडळ)