Crocodile At Carambolim Lake

तिसवाडी: करमळी तळात म्हशीचा मृत्यू हा बुडून झाला आहे, मगरीच्या चाव्याने नव्हे. वन खात्याच्या अधिकाऱ्यांनी घटनास्थळी जाऊन मृत म्हशीची तपासणी केल्यानंतर अहवाल सादर केला, त्यात जखम झाल्याचे दिसत नसल्याची माहिती उपवनसंरक्षक प्रेम कुमार यांनी दिली.

पाणथळ म्हणून अधिसूचित झालेल्या करमळी तळात म्हैशीला मगरीने मारल्याचा दावा करण्यात आला होता. त्यात गणपती विसर्जनाला देखील स्थानिकांच्या मनात भीती निर्माण झाली होती. यासंदर्भात कुमार यांना प्रश्न विचारला असताना त्यांनी सांगितले की, वन खात्याचे अधिकाऱ्यांना गस्ती करून पाळत ठेवण्याची सूचना केली आहे. सध्या तळात अंदाजे ५० ते ७० मगरींची संख्या आहे.

स्थानिक दिनेश उसगावकर म्हणाले की, उपवनसंरक्षक यांनी दिलेल्या माहितीशी आम्ही सहमत नाही, कारण जनावराचा तळ्यात कधीच बुडून मृत्यू झाल्याची घटना घडली नाही. तळ्यात मगरींची संख्या ५० – ७० असू शकत नाही. मगरींना कुंभारजुवे कालव्यात स्थलांतरित केले पाहिजे, अन्यथा जीवाला धोका निर्माण होऊ शकतो.