पणजी : गोव्यात आज काही भागांमध्ये पावसाची शक्यता आहे. अनेक भागांमध्ये सकाळपासूनच ढगाळ वातावरण पाहायला मिळत असून काल गुरुवारी संध्याकाळी पावसाच्या हलक्या सरी बरसल्याची माहिती आहे. गेल्या काही दिवसांपासून गोव्यात अवकाळी पावसामुळे मोठं नुकसान झालं आहे. (Goa Weather Updates)

गोव्यात नेहमीच पावसाची दमदार हजेरी असणाऱ्या सत्तरी आणि धारबांदोडा तालुक्यांवर ढग जमा झाले असून गोव्यात अनेक ठिकाणी ढगाळ वातावरण पाहायला मिळालं आहे. त्यामुळे आज गोव्यात हलक्या ते मध्यम स्वरुपाचा पाऊस पडण्याची शक्यता वर्तवली जात आहे. पुढील काही तासांत उत्तर गोव्यात काही ठिकाणी पाऊस असेल. त्यामुळे गोवेकरांची तारांबळ उडण्याची शक्यता आहे.

दरम्यान गोव्यात उकाडाची कायम आहे. सततच्या उकाड्यामुळे गोवेकर त्रस्त झाले असून वीजेच्या टंचाईमुळे गोव्यात अनेकदा लोड शेडिंगही केलं जात आहे. यातच अनेकदा पाऊस पडत असल्याने वादळी वाऱ्यामुळे वीजप्रवाह खंडित होतो. त्यामुळे गेल्या काही दिवसात सर्वसामान्य नागरिकांना नाहक मनस्ताप सहन करावा लागत आहे.