Porvorim Police Arrest Accused In Allegedly Attempting Murder Case: नेरुल येथे एका युवकावर प्राणघातक हल्ल्या प्रकरणी पश्चिम बंगाल येथील एका संशयिताला पर्वरी पोलिसांनी अटक केली आहे. हा हल्ला पैशांच्या देवाणघेवाणीवरून झाल्याची माहिती समोर येत आहे.

जखमी युवकाला गोमेकॉत उपचारासाठी दाखल करण्यात आले असून पोलीस उपनिरीक्षक सर्वेश भंडारी अधिक चौकशी करीत आहेत.

पर्वरी पोलिसांनी दिलेल्या माहितीनुसार, टिटवाळा नेरूल येथील एका महिलेने दिलेल्या तक्रारीनुसार, 1 ऑक्टोंबरला सकाळी पावणेसात वाजण्याच्या सुमारास नेरुल चर्च जवळ, पश्चिम बंगाल येथील दीपक कुमार पाधी या युवकाने उसप, दोडामार्ग येथील अनिल महादेव गावस या 33 वर्षीय युवकाच्या छातीवर व शरीराच्या इतर भागावर चाकूने वार केले असे तक्रारीत नमुद करण्यात आले.

तक्रारीच्या आधारे पर्वरी पोलिसांनी संशयिताचा शोध घेतला असता दीपक कुमार पाधी रा. नेरुळ बार्देश याला अटक करण्यात आले. संशयिताला म्हापसा न्यायालयात हजर केले असता सात दिवसांची पोलीस कोठडी सुनावण्यात आली. जखमी युवक हा नेरूलमध्ये भाड्याने राहत होता.

तर संशयित कांदोळी येथील एका कॅसिनोमध्ये काम करत होता तर तो नेरुल येथे राहत होता. दोघांमध्ये पैशांच्या देवाणघेवाणीवरून वाद झाल्याने ही घटना घडली असे तपासात समोर आले.