Goan Food: गोव्यातील पाककृती आणि संस्कृतीचे प्रशिक्षण घेण्यासाठी पोर्तुगालमधून 12 विद्यार्थी दाखल झाले आहेत. त्यांनी नुकतीच व्ही. एम. साळगावकर महाविद्यालयास भेट दिली. संस्थेने आयोजित केलेल्या सांस्कृतिक देवाण-घेवाण उपक्रमाचा हा पहिला कार्यक्रम ठरला.

टुरिस्मो डी पोर्तुगाल या संस्थेद्वारे पोर्तुगालमधील विविध आतिथ्य संस्थांमधून या विद्यार्थ्यांची निवड करण्यात आली आहे. साळगावकर महाविद्यालयामध्ये पाहुण्या विद्यार्थ्यांचे पारंपरिक पद्धतीने स्वागत करण्यात आले.

पोर्तुगाल आणि भारत यांच्यातील आदरातिथ्य आणि पर्यटन क्षेत्रातील व्यावसायिक कौशल्य, सांस्कृतिक एकात्मता सुधारणे, तसेच शिक्षक आणि विद्यार्थ्यांमधील परस्परसंवाद वाढवणे, हा विनिमय कार्यक्रमाचा उद्देश आहे. चार आठवडे या विद्यार्थ्यांचा गोव्यात मुक्काम असेल.

गोव्यातील पारंपरिक फळे आणि भाज्यांच्या विस्तृत वर्गीकरणासाठी सुप्रसिद्ध असलेल्या मडगाव मार्केटला भेट अशा उपक्रमांचा समावेश या भेटीत असेल.