फोंडा: सरकारी नोकऱ्यांचे आमिष दाखवून अनेकांना लाखो रुपयांना गंडा घालणारी पूजा नाईक हिला फोंडा प्रथमवर्ग न्यायालयाने २० हजार रुपयांची हमी आणि अन्य अटींवर सशर्त जामीन मंजूर केला आहे. मात्र या अटींची पूर्तता करेपर्यंत तिची रवानगी न्यायालयीन कोठडीत करण्यात आली आहे.

नोकऱ्या देण्याच्या बहाण्याने प्रियोळ येथील गुरुदास गावडे यांना गंडा घातल्याच्या प्रकरणात म्हार्दोळ पोलिसांनी अटक केलेल्या श्रावणी ऊर्फ पूजा नाईक हिच्या ताब्यातील चार महागड्या कारगाड्या पोलिसांनी जप्त केल्या आहेत.

तसेच ती राहत असलेल्या ओल्ड गोव्यातील पॉश कॉलनीमध्ये जाऊन चौकशी सुरू केली आहे. एकदम साधी राहणीमान आणि पतीचा मासळी विक्रीचा व्यवसाय असूनसुद्धा तिच्याकडे चार प्लॅट असल्याची बाब समोर आली आहे.

मुख्यमंत्री डॉ. प्रमोद सावंत यांनी देखील या प्रकरणाची दखल घेत यात दोन सरकारी अधिकाऱ्यांची चौकशी होणार असल्याची माहिती दिली. पूजा नाईकने सरकारी विभागातील अधिकऱ्यांना हाताशी धरुन अनेकांची फसवणूक केल्याचे समोर आले आहे. या बाबीं देखील विचारात घेऊन पोलिस तपास करत आहेत.

पूजा नाईक प्रकरणात दररोज नवीन खुलासे होत आहेत. यासंबधित अनेकांची नावे समोर येत आहेत. पोलिसांनी आत्तापर्यंत नऊ जणांना ताब्यात घेतले असून, अजून काही नावे समोर येण्याची शक्यता आहे. सरकारी अधिकाऱ्यांचा समावेश देखील या प्रकरणात समावेश उघड झाल्याने काही मंत्र्यांची देखील नावे समोर येण्याची शक्यता वर्तवली जात असून, काही मंत्र्यांचे धाबे दणाणले आहेत.