राज्यात आरोग्य सुविधा उपलब्ध करण्यास सरकार पूर्णपणे अपयशी ठरले असून आरोग्यमंत्र्यांच्या घोषणा हवेत विरत असतानाच मुख्यमंत्र्यांकडून कर्ज काढून मोठे इव्हेंट केले जात असल्याचा आरोप काँग्रेसच्या नेत्यांनी फोंड्यातील आयडी उपजिल्हा इस्पितळातील गैरसोयींवर बोट ठेवताना केला.

काँग्रेस पक्षाचे दक्षिण गोव्याचे खासदार विरियातो फर्नांडिस, विरोधी पक्षनेते युरी आलेमांव, प्रदेश काँग्रेसाध्यक्ष अमित पाटकर, फोंड्याचे काँग्रेस नेते राजेश वेरेकर तसेच काँग्रेस पक्षाच्या इतर कार्यकर्त्यांनी आज या इस्पितळाची पाहणी करून वैद्यकीय अधीक्षक डॉ. जयश्री मडकईकर यांना जाब विचारला.

फोंडा तालुक्यातील लोकांच्या आरोग्यासाठी पुरेसा डॉक्टर वर्ग, सीटी स्कॅन, रक्तपेढी आणि महत्त्वाचे म्हणजे शस्त्रक्रिया करणारा डॉक्टरच गेले दीड वर्ष या इस्पितळात नाही, असे खासदार विरियातो फर्नांडिस यांनी सांगितले. विरोधी पक्षनेते युरी आलेमाव यांनी वैद्यकीय अधीक्षक डॉ. जयश्री मडकईकर यांना आरोग्य सेवेतील त्रुटी काय ते आम्हाला स्पष्टपणे कळू द्या, असे सांगत लोकांना प्रत्येकवेळी बांबोळीला पाठवणे योग्य नसल्याचे नमूद केले. काँग्रेस पक्ष राज्यातील विविध समस्यांप्रती आक्रमक असून गप्प बसणार नाही, असेही ते म्हणाले.