पणजी: अमली पदार्थ आणि सायकोट्रॉपिक विक्रीच्या नोंदींत फेरफार केल्यामुळे फोंडा येथील फार्मसीचा परवाना एका आठवड्यासाठी निलंबित करण्यात आला आहे. तसेच, औषध विक्रीची व्यवस्थित नोंद योग्यरित्या न ठेवल्यामुळे मडगाव येथील एका फार्मासिस्टचा परवाना अन्न आणि औषध प्रशासनाकडून एका आठवड्यासाठी निलंबित करण्यात आला आहे.

2024 ते 2025 या काळात अन्न आणि औषध प्रशासनाच्या वतीने १,२६९ नमूने गोळा करण्यात आले होते. यापैकी एकातही संशयास्पद पदार्थ किंवा भेसळ नसल्याचे आढळून आले आहे. अन्न आणि औषध प्रशासन (FDA) च्या वतीने याबाबत माहिती देण्यात आली आहे.

एफडीएने ७०३ ठिकाणी तपासणी करुन १,२६९ नमूने गोळा करण्यात आले होते. गुणवत्ता तपासणीसाठी राज्यातील औषध विक्रेते, उत्पादक, घाऊक विक्रेते, सरकारी रुग्णालये, नर्सिंग होम, क्लिनिक या ठिकाणांवरुन हे नमूने गोळा करण्यात आले होते. तपासणीनंतर या नमून्यामंध्ये कोणताही संशयास्पद पदार्थ किंवा भेसळ आढळून आली नसल्याचे एफडीएने स्पष्ट केले आहे.

गोवा भारतातील औषध निर्मितीचे महत्वाचे केंद्र आहे. राज्यात उत्पादन केलेली औषधे अमेरिका, युके यासह विविध देशांमध्ये निर्यात केली जातात. २०१४ ते २०१५ या काळात गोव्यासह देशभरातून ५०,००० नमूने गोळा करण्यात आले होते. त्यावेळी देखील राज्यात औषधांमध्ये भेसळ आढळून आली नव्हती, अशी माहिती एफडीएने दिली.