Ponda Accident :

फोंडा अपघातांचे सत्र सुरूच असून नागरिकांचे बळी जाण्याचे दुष्टचक्र थांबता थांबेना अशी स्थिती राज्यात निर्माण झाली आहे.

गेल्या अनेक दिवसांपासून या ना त्या कारणाने राज्यात अपघातांचे प्रमाण वाढतच आहे. त्यात रस्त्यांवर पडलेले खड्डे, चालकाचा निष्काळजीपणा आणि धूम स्टाईलची क्रेझ या प्रमुख कारणांचा समावेश आहे. आज कुर्टी, पंचवाडी, पेडणे येथे तीन ठिकाणी झालेल्या भीषण अपघातांत तिघांचे बळी जाण्याची दुर्घटना घडली आहे.

पंचवाडी - शिरोडा येथे शुक्रवारी सकाळी एका टँकरने ट्रक व कारला धडक देऊन झालेल्या झालेल्या विचित्र अपघातात टँकरमधील तिघांपैकी हसन अब्बास शिलेदार (वय ४२, आनंदवाडी - सावर्डे) हा ठार झाला. जीए - ०१ - झेड - १३०५ या क्रमांच्या टँकरची धडक समोरून जाणाऱ्या जीए - ०९ - यू - ३६४६ या क्रमांकाच्या खडीवाहू ट्रकच्या टायरला बसल्यानंतर समोरून येणाऱ्या जीए - ११ - सी - ४५८३ क्रमांकाच्या टुरिस्ट टॅक्सीला बसली. या विचित्र अपघातात पाणीवाहू टँकर रस्त्यावर उलटा झाला, त्यात टँकरमधील तिघांपैकी एकाचा मृत्यू झाला, तर दोघे जखमी झाले. कारमधील वरून चंद्रावती कोरगावकर (वय ७०, पेडणे) ही महिला जखमी झाली असून तिला उपचारासाठी इस्पितळात दाखल करण्यात आले आहे. फोंडा पोलिस या अपघातप्रकरणी अधिक तपास करीत आहेत.

हसन अपघातस्थळी रक्ताच्या थारोळ्यात

ट्रक, कारला धडक देऊन पाणीवाहू टँकर उलटल्याने त्यात तिघेजण अडकले. त्यापैकी हसन अब्बास शिलेदार हा ठार झाला, तर इतर दोघे किरकोळ जखमी झाले. टँकरमध्ये हसन रक्ताच्या थारोळ्यात अडकून पडला होता. त्याला शिरोडा सरकारी इस्पितळात नेण्यात आले, पण तेथे त्याचा मृत्यू झाल्याचे सांगण्यात आले. तो सावर्डेतील एका गॅरेजमध्ये कामाला होता. टँकर भर रस्त्यावर उलटल्याने वाहतुकीची कोंडी झाली होती.