शिरोडा Political News : जाती धर्माच्या आधारावर राजकारण करून भाजप देशात फूट पाडत आहे. आगामी विधानसभा निवडणुकीत (Assembly Election) भाजपचा पराभव हे एकच ध्येय डोळ्यांसमोर ठेवा. बंगालचा तृणमूल (TMC) आणि दिल्लीचा ‘आप’ (AAP) भाजपचा (BJP) पराभव करू शकत नाही, तर फक्त काँग्रेस (Congress) पक्षच भाजपला खाली खेचू शकतो, असे प्रतिपादन काँग्रेसचे ज्येष्ठ नेते पी. चिदंबरम (P.Chidambaram) यांनी केले.

शिरोडा गट काँग्रेसने येथील पॅराडाईज सभागृहात आज आयोजित केलेल्या काँग्रेस कार्यकर्त्यांच्या सभेत ते‌ बोलत होते. याप्रसंगी विरोधी पक्षनेते दिगंबर कामत, माजी आमदार आलेक्स सिक्वेरा, प्रदेश काँग्रेसचे उपाध्यक्ष एम. के. शेख, ज्यो डायस, पक्षाचे निरीक्षक सुनील हनुमन्नवार, हेमंत सामंत, पंच सदस्य अँथोनी डिकॉस्टा, किस्तोद गुदिन्हो, बोरीच्या सरपंच ज्योती नाईक, शिरोडा गट काँग्रेसचे अध्यक्ष डिकॉस्टा, इच्छुक उमेदवार मुकेश नाईक, देविदास किन्नरकर हे व्यासपीठावर होते.

चिदंबरम‌ म्हणाले, की 2017 च्या विधानसभा निवडणुकीत काँग्रेस पक्षाच्या उमेदवारीवर निवडून आलेल्यांनी घात केला. पक्षाचे कार्यकर्ते प्रामाणिक राहिले. यावेळी शंभर टक्के प्रामाणिक असलेल्यांनाच पक्षाची उमेदवारी दिली जाणार आहे. काँग्रेस सत्तेवर आल्यावर बेरोजगारीचा प्रश्‍न सोडविणार आहे. यात पहिल्यांदा विविध खात्यांतील रिक्त जागा भरणार आहे. एस. सी., एस. टीं.ना नोकरीत राखीव जागा दिल्या जातील. नोकरीसाठी विदेशात जाणाऱ्यांना राज्यातच नोकऱ्या उपलब्ध करून दिल्या जाणार आहेत.

राज्यात महिला सुरक्षित नाहीत, त्यामुळे महिला पोलिसांची भरती केली जाईल. इन्फोटेक्नॉलॉजी, बायोटेक्नॉलॉजी, आयटी यासाख्या क्षेत्रात जास्त नोकऱ्या उपलब्ध होतात. या सर्वांचे गोव्यात मोठे केंद्र उभारले जाणार आहे. गोवा सर्व क्षेत्रात पुढे आणण्याचा प्रयत्न काँग्रेस पक्ष करणार आहे, असेही ते म्‍हणाले.

‘काँग्रेसच्या राजवटीत सर्वाथाने विकास’

विरोधी पक्षनेते दिगंबर कामत म्हणाले, की काँग्रेस पक्षाच्या राजवटीत राज्याचा सर्वार्थाने विकास झाला होता. आजच्या सरकारने गोमंतकीयांची फसवणूक करण्याचेच काम केले आहे. तत्कालीन मुख्यमंत्री पर्रीकर यांनी कितीही महागाई झाली तरी पेट्रोलचा दर ६० रु. लिटर ठेवला जाईल असे सांगितले होते. आता स्वयंपाक गॅस, पेट्रोल, डिझेल यांच्या किंमती किती वाढलेल्या आहेत हे आम्हाला सांगायला नको. राज्यात रस्ते चांगले नाहीत. आम आदमी पार्टी, केजरीवाल आणि बंगालचा तृणमूल गोव्यात नको. गोमंतकीय लाचार नाहीत. शिरोडा मतदार संघाबरोबरच गोव्यात या खेपेला काँग्रेसचाच झेंडा फडकणार आहे.