राज्यात अवैध मद्य अन् अमली पदार्थ विक्रीला आळा बसणार की या फक्त घोषणाच असणार असा सवाल आता नागरिक करु लागले आहेत. कारण अशी प्रकरणे थांबण्याऐवजी वाढतच आहे अशी शंका नागरिकांना येत आहे. असे असताना आज कळंगुट पोलिसांनी आणखी एकाला अवैध मद्य अन् अमली पदार्थ विक्री प्रकरणी ताब्यात घेतले आहे.

(Police nabbed drug peddler at Calangute )

मिळालेल्या माहितीनुसार डॉल्फिन सर्कल, कळंगुट येथे एक व्यक्ती अवैध मद्य अन् अमली पदार्थ विक्रीसाठी आली असल्याची माहिती मिळाली यावरुन पोलिसांनी तातडीने तपास केला असता एक व्यक्ती अवैध मद्य अन् अमली पदार्थ विक्री करत असल्याचे आढळून आले आहे. त्याच्याकडून सुमारे सव्वा लाखाचा गांजा अन् अवैध मद्य साठा जप्त करत आरोपीला अटक करण्यात आली आहे.

कारवाई करण्यात आलेला संशयित आरोपीचे नाव मुहम्मद जाफर गुडुमिया असे असून आरोपी मुळ रहिवाशी कारवार, कर्नाटक येथील असल्याची माहिती समोर आली आहे. कारवाई वेळी संशयिताकडून अवैध मद्य साठा आणि सुमारे 1, 10,000 किंमतीचा 1100 ग्रॅम वजनाचा गांजा जप्त करण्यात आला आहे. ही कारवाई पीएसआय किरण नाईक यांच्यासह एलपीएसआय प्रगती मलिक पीसी विद्यानंद आमोणकर, गणपत तिलोजी, अमीर गरड, विजय नाईक, संज्योत केरकर यांनी केली.