Calangute Police Checks Massage Parlor, Wellness Centre: कळंगुट येथील नाईकवाडा मध्ये बेकायदा मसाज पार्लर्स कायमस्वरूपी बंद करण्यासाठी ग्रामस्थ सोमवारी आक्रमक झाले होते.

या आंदोलनानंतर या पंचायत मंडळाने बेकायदा मसाज पार्लरला टाळे ठोकले होते. त्यानंतर आज, मंगळवारी कळंगुट परिसरातील अनेक मसाज पार्लर, वेलनेस सेंटरची म्हापसा पोलिसांनी तपासणी केली.

कळंगुट पोलिस स्टेशनचे पोलिस निरीक्षक परेश नाईक, पोलिस उपनिरीक्षक प्रगती मलिक, आरोग्य निरीक्षक कमलाकांत पार्सेकर, कळंगुट व्हिलेज पंचायतीचे प्रतिनिधी शेखर पालयेकर आणि कळंगुट पोलिस स्टेशनच्या कर्मचाऱ्यांनी पर्वरीचे एसडीपीओ यांच्या मार्गदर्शनाखाली ही कार्यवाही केली.

कळंगुट येथील टिट्टोज लेनमधील लेलाई एक्झॉटिक सेंटर, स्नो पार्कजवळील एसओआय थाई, भारत जंक्शन येथील बुद्ध स्पा, भारत जंक्शन येथील डी फ्लोरा, कांदोळी प्राथमिक आरोग्य केंद्राजवळील आयुर्वेदिक मसाज उपचार केंद्र या ठिकाणी पोलिसांनी तपासणी केली.

यावेळी 'डी फ्लोरा स्पा' वगळता इतर वेलनेस सेंटर आणि स्पामध्ये कर्मचारी उपस्थइत होते. त्यांच्याकडे स्पा आणि वेलनेस सेंटर चालवण्यासाठीच्या कागदपत्रांची मागणी करण्यात आली. तथापि, अनेकजण आवश्यक कागदपत्रे सादर करू शकले नाहीत.

त्यांनी तात्पुरत्या काळासाठी देण्यात आलेली प्रमाणपत्रे दाखवली. तसेच अनेकांनी त्यांचे परवाने सध्या प्रक्रियेत असल्याची माहिती दिली. वैध परवाने नसलेली सेंटर्स, स्पा बंद करण्याच्या सूचना पोलिसांनी मालकांना दिल्या आहेत.