मडगाव: पोलिस अधिकारी असल्याचे भासवून एका मासळीवाहू वाहनाच्या चालकाला लुबाडणाऱ्या त्या दोन भामट्यांचा सध्या शोध सुरू आहे. मडगाव पोलिसांनी काहीजणांना ताब्यात घेऊन त्यांची चौकशी ही केली. मात्र त्यांचा या घटनेची संबंध नसल्याचा आढळून आले आहे.

बुधवारी (ता. ७) भरदिवसा  शिरली, धर्मापूर येथील राष्ट्रीय हमरस्तावर दोन भामट्यांनी मूळ कारवार जिल्ह्यातील मुर्डेश्वर येथील श्रीधर मोगेर या मासळीवाहू वाहनचालकाला अडवून पोलिस असल्याची बतावणी केली व वाहन चालकाकडे असलेली ४ लाख ८३ हजार रोकड  घेउन पोबारा केला होता.

मडगाव पोलिसांनी अज्ञाताविरोधात गुन्हा नोंद केला आहे. पोलिस निरीक्षक सूरज सामंत यांच्या मार्गदर्शनाखाली उपनिरीक्षक संजय वेळीप पुढील तपास करीत आहेत. ज्या ठिकाणी ही घटना घडली तेथे सीसीटीव्ही कॅमेराही नसल्याने पोलिस तपासात अडचणी येत आहे. तक्रारदाराने संशयितांचे वर्णन केले आहे. त्याआधारे पोलिस पुढील तपास करीत आहे.