Safety Measures Discussed at Meeting of Cruise Operators By Police

पणजी: गोव्यात सुरू झालेल्या पर्यटन हंगामाच्या पार्श्‍वभूमीवर पणजी उपविभागीय पोलिस अधिकाऱ्यांनी पणजी जेटीवरून कार्यान्वित असलेल्या क्रुझ ऑपरेटर्सची बैठक आज घेतली. त्यांच्याकडे कामाला असलेल्या कर्मचाऱ्यांची नोंदणी पर्यटन खात्याकडे करण्याची तसेच रात्री १० वाजल्यानंतर संगीत बंद करावे. या वेळेनंतर संगीत सुरूच राहिल्यास कारवाई होईल, अशा कानपिचक्या दिल्या.

क्रुझ ऑपरेटर्सच्या कर्मचाऱ्यांकडून पर्यटकांची सतावणूक होण्याचे प्रकार काहीवेळा घडत असतात. अशावेळी संबंधित कर्मचाऱ्यांची माहिती उपलब्ध नसल्याने कारवाई करण्यास अडचणी येतात. त्यामुळे या सर्व कर्मचाऱ्यांची पोलिसांमध्ये अर्ज सादर करून पडताळणी करण्यात यावी.

क्रुझ बोटीवर संगीत वाजवण्यासाठी संबंधित अधिकाऱ्यांकडून परवानगी घ्यावी. रात्री १० वाजल्यानंतर संगीत बंद करावे. आपत्कालीन घटनेवेळी आवश्‍यक ती सुरक्षा उपकरणे बोटीवर उपलब्ध ठेवणे. तिकीट आकारणाऱ्यांची पर्यटन खात्याकडे नोंदणी करणे. क्रुझ बोटीवरील जलसफरीसाठी अधिकृत तिकीट जारी करावे. भरमसाट तिकिटे आकारून पर्यटकांची लूट न करण्याच्या सूचना उपविभागीय पोलिस अधिकारी सुदेश नाईक यांनी क्रुझ ऑपरेटर्सना दिल्या.

व्यवस्थापनाला सूचना

क्रुझ ऑपरेटर्सच्या कर्मचाऱ्यांकडून भरमसाट तिकीट शुल्क आकारून लुटमार होत असल्याच्या कारणावरून तेथील कर्मचारी व पर्यटकांमध्ये भांडणे होण्याबरोबरच कधी त्याचे रूपांतर मारहाणीमध्ये झाल्याच्या घटना नोंद आहेत. त्यामुळे पोलिस उपअधीक्षक सुदेश नाईक यांनी क्रुझ ऑपरेटर्सच्या व्यवस्थापनाला बोलावून योग्य त्या सूचना केल्या व त्याचे काटेकोरपणे पालन करण्याचे आवाहन केले. यावेळी पणजीचे पोलिस निरीक्षक विजय चोडणकर उपस्थित होते.