Assagao Loud Music Issue

पणजी: आसगाव येथे ध्वनिप्रदूषण करणाऱ्या क्लब परिसरात ठरावीक पोलिसांनाच तैनात केल्याच्या आरोपांवरून हणजूण पोलिस ठाण्याचे ड्युटी मास्तर रामा परब यांना निलंबित करण्याची तत्परता दाखवणारे पोलिस खाते इतर पोलिसांवर कधी कारवाई करणार, असा प्रश्न निर्माण झाला आहे.

क्लबवर कारवाई न करणाऱ्या पोलिसांवर कारवाई न करून परब यांच्या निलंबनामागे मेहरनजर हे कारण नसून राज्याच्या मुख्य सचिवांना आपल्या पोलिस ठाण्याच्या हद्दीबाहेर पोलिस संरक्षण न देण्याचेच कारण आहे, यावर शिक्कामोर्तब झाल्याची चर्चा सुरू झाली आहे.

आसगाव येथील ध्वनिप्रदूषणाबाबत स्थानिकांनी सलग तीन रात्री आंदोलन केले. दक्षिण गोव्याचे खासदार विरियातो फर्नांडिस हेही त्यात सहभागी झाले. गोवा राज्य प्रदूषण नियंत्रण मंडळाने आसगाव परिसरात क्लबचे वीज-पाणी जोड बंद करण्याचे आदेश दिले होते.

त्याच्या आदेशानुसार या क्लबांनी आपले व्यवहार बंद केले पाहिजे होते. तसे न करता जनरेटरच्या साहाय्याने आणि टॅंकरमधून पाणी आणून सरकारी यंत्रणेच्या नाकावर टिच्चून या क्लबमध्ये रात्रीच्या वेळी पार्ट्यांचे आयोजन करण्यात येत होते. मंडळाच्या अधिकाऱ्यांनी आसगाव येथे रात्रीच्यावेळी भेट दिली असता ही बाब उघड झाली होती. त्यावेळी पोलिस खात्याकडून आम्हाला क्लब बंद करण्याच्या आदेशांची काही कल्पनाच नाही, असा दावा करण्यात आला होता.