पणजी: पोलिस कोठडीतून आरोपी सुलेमान खानला पलायन करण्यास मदत केल्याप्रकरणी पोलिस कर्मचारी अमित नाईक, आरोपी सुलेमान खान आणि हजरतसाब बवन्नवार यांच्यावर आरोप निश्चित करण्याचे आदेश मेरशी येथील मुख्य न्यायदंडाधिकारी न्यायालयाने दिले आहेत.

१३ डिसेंबर २०२४ रोजी सिद्धिकी ऊर्फ सुलेमान खान हा रायबंदर येथील गुन्हे शाखेच्या कोठडीतून पळाला होता. त्याला म्हापसा पोलिसांच्या एका गुन्ह्याप्रकरणी अटक करण्यात आली होती.

सरकारी पक्षाच्या दाव्यानुसार, सुलेमानने पहारा देणारा पोलिस कर्मचारी अमित नाईक याच्याशी संगनमत करून हे पलायन केले. अमितने सुलेमानला कोठडीतून बाहेर काढले आणि दोघेही मोटारसायकलवरून पसार झाले.

त्यानंतर कर्नाटकच्या हुबळीमध्ये हजरतसाब बवन्नवार याने सुलेमानला लपवून ठेवण्यास मदत केल्याचा आरोप आहे. न्यायालयाने सीसीटीव्ही फुटेज आणि साक्षीदारांच्या जबाबांची तपासणी केल्यानंतर तिघांविरोधात खटला चालवण्याइतपत सबळ पुरावे असल्याचे स्पष्ट केले आहे.

सुलेमान खानवर कोठडीतून पलायन आणि गुन्हेगारी कट रचल्याबद्दल बीएनएस कलम २६२, ६१(२)(अ) नुसार आरोप निश्चित करण्यात आले आहेत. तसेच अमित नाईकवर सरकारी नोकर असूनही आरोपीला पळवून नेणे, आश्रय देणे आणि जाणीवपूर्वक कर्तव्यात कसूर केल्याप्रकरणी आरोप निश्चित केले आहेत.