Complaints Against Goa CM Pramod Sawant: गोव्याचे मुख्यमंत्री डॉ. प्रमोद सावंत यांच्याविरोधात पाटणा (बिहार) येथे गुन्हा दाखल करण्यात आला आहे. मुख्यमंत्री सावंत यांनी एक मे रोजी कामगार दिनानिमित्त झालेल्या कार्यक्रमात परप्रांतीय बिहारी कामगारांबाबत केलेल्या वक्तव्यावरून त्यांच्याविरोधात तक्रार दाखल करण्यात आली आहे.

बिहारमधील सत्ताधारी पक्ष असलेल्या जनता दल युनायटेडचे नेते मनिष सिंह यांनी ही तक्रार दाखल केली असून त्यावरून गुन्हा दाखल करण्यात आला आहे. गोव्याचे मुख्यमंत्री प्रमोद सावंत यांनी बिहारमध्ये येऊन आपल्या वादग्रस्त वक्तव्याबद्दल बिहारींची माफी मागावी, अशी मागणीही त्यांनी केली आहे.

मनिष सिंह यांनी म्हटले आहे की, मुख्यमंत्रीसारख्या जबाबदार पदावर असलेल्या व्यक्तीने अशी वक्तव्ये करू नयेत. अशी वक्तव्ये करून लोकांना आपापसात भांडण लावण्याचा प्रयत्न करू नये. जर प्रमोद सावंत यांनी माफी मागितली नाही तर त्यांना कोर्टात येऊन उत्तर द्यावे लागेल.

ते म्हणाले की, बिहारमधील लोक त्यांच्या क्षमतेच्या जोरावर राज्याबाहेर राहतात. आपल्या प्रतिभेच्या बळावर बिहारी लोकांनी केवळ भारतातच नव्हे तर जगभरात आपला ठसा उमटवला आहे.

देशातील अनेक आयएएस, आयपीएस आणि आयआयटी अभियंते बिहारमधून बनलेले आहेत. हे गोव्याच्या मुख्यमंत्र्यांना माहिती करून घ्यावे.

काय म्हणाले तेजस्वी यादव?

दरम्यान, बिहारचे उपमुख्यमंत्री तेजस्वी यादव यांनी ट्विटमध्ये म्हटले आहे की, केंद्रीय मंत्री पीयूष गोयल यांच्यानंतर आता गोव्याच्या मुख्यमंत्र्यांनी बिहारी जनतेचा अपमान केला आहे. गोव्याचे मुख्यमंत्री प्रमोद सावंत यांचे हे वक्तव्य लाजिरवाणे आहे.

त्यांनी बिहार आणि बिहारच्या जनतेचा अपमान केला आहे. भाजप नेते बिहारच्या लोकांचा इतका द्वेष का करतात? केंद्रातील भाजप सरकारही बिहारच्या हक्कांबाबत उदासीन आहे.

काय म्हणाले होते प्रमोद सावंत?

मुख्यमंत्री प्रमोद सावंत म्हणाले होते की, गोव्यातील बहुतांश गुन्हे हे यूपी-बिहारमधील लोक करतात. गोव्यातील 90 टक्क्यांहून अधिक गुन्ह्यांमध्ये येथील परप्रांतीय असलेल्या बिहारमधील मजुरांचा सहभाग असतो.