PM Narendra Modi Sabha in Goa:

येत्या 6 फेब्रुवारीला मडगावात पंतप्रधान मोदींची जाहीर सभा होणार आहे. ही सभा मडगाव बसस्थानकाच्या मैदानावर होणार असून याबाबत जिल्हा प्रशासन आणि विविध विभागांच्या अधिकाऱ्यांनी याच्या तयारीचा आढावा घेतला आहे.

त्यामुळे बसस्थानकातून सध्याच्या बसेस एसएजी मैदानावर हलवण्यात आल्या आहेत. याबाबत जिल्हाधिकाऱ्यांनी सोमवारी अधिसूचना जारी केली होती. सभेच्या पार्श्वभूमीवर 1 फेब्रुवारी ते 8 फेब्रुवारीदरम्यान केटीसी बसस्थानक तात्पुरते बंद ठेवण्याची अधिसूचना देखील त्यांनी दिली.

आंतरराज्य बसेस आधीच SGPDA पार्किंग ग्राउंडवर हलवण्यात आल्या आहेत. तर कदंब बसेस जलतरण तलावाजवळील क्रीडा प्राधिकरण मैदानावर हलवल्या आहेत. 

याबाबत दिगंबर कामत म्हणाले की, पंतप्रधान मोदी या बैठकीत केंद्र सरकारच्या योजनांवर बोलणार असून मुख्यमंत्री प्रमोद सावंत राज्य सरकारच्या कामगिरीवर उपस्थितांना संबोधित करतील. यावेळी वाहतूक कोंडी टाळण्यासाठी ठिकठिकाणी पार्किंगची सुविधा करण्यात येणार आहे. दक्षिण गोव्यातील पंतप्रधानांची ही पहिलीच सभा असल्याने इथे मोठ्या प्रमाणात गर्दी होण्याची शक्यता आहे. यामुळे अधिकारीवर्ग आणि पोलीस यासाठी सज्ज आहेत.

दरम्यान, या कालावधीत परिसरातील व्यावसायिकांनाही आपली दुकाने बंद करण्यास सांगितले आहे.