गोवा राज्यातर्फे राज्यभर शिवजयंतीचे कार्यक्रम आयोजित करण्यात आले असून राज्यात विविध ठिकाणी एकूण शिवचरित्रावर आधारित एकूण तेरा नाट्यप्रयोग सादर केले जाणार आहेत.

शिवजयंतीचा मुख्य कार्यक्रम फर्मागुढी - फोंडा येथील शिवकिल्ल्यावर व गोपाळ गणपती देवस्थानच्या प्रांगणात होणार असल्याची माहिती राज्य सरकारच्या माहिती खात्याचे संचालक दीपक बांदेकर यांनी फोंड्यात घेतलेल्या पत्रकार परिषदेत दिली.

यावेळी बांदोडा सरपंच सुखानंद कुर्पासकर, माहिती खात्याचे अधिकारी ऑल्विन परेरा तसेच शिवजयंती आयोजन समितीचे सदस्य जगन्नाथ मुळवी व नरेंद्र तारी आदी उपस्थित होते.

फर्मागुढीतील शिवकिल्ल्यावर सकाळी साडेआठ वाजता मडकईच्या जगदंब पथकातर्फे ढोलताशाचा कार्यक्रम होणार आहे. त्यानंतर बाल भवनच्या मुलांतर्फे पोवाडे सादर केले जातील. मुख्यमंत्री डॉ. प्रमोद सावंत यांच्या हस्ते तसेच कृषीमंत्री रवी नाईक, जलस्त्रोत खात्याचे मंत्री सुभाष शिरोडकर, वीजमंत्री सुदिन ढवळीकर व कला संस्कृतीमंत्री गोविंद गावडे यांच्या तसेच जिल्हा पंचायत सदस्य गणपत नाईक, बांदोडा सरपंच सुखानंद कुर्पासकर, माहिती आणि प्रसिद्धी खात्याचे सचिव सुभाष चंद्रा, संचालक दीपक बांदेकर, प्रमुख वक्ते कोल्हापूर येथील डॉ. अमर अडके आणि स्वातंत्र्यसैनिकांच्या व शिवप्रेमींच्या उपस्थितीत शिवाजी महाराजांच्या पुतळ्याला पुष्पहार अर्पण केले जातील.

महाविद्यालयीन विद्यार्थ्यांसाठी प्रश्‍नमंजुषा व शिवाजी महाराजांवर आधारित नाय प्रवेश स्पर्धा होणार आहे. राज्यभर विविध ऐतिहासिक नाटकांचे प्रयोग संध्याकाळी साडेसात वाजता सादर केले जातील.

सादर केले जाणारे नाट्यप्रयोग

• 18 रोजी फोंडा बसस्थानकावर ‘करीन ती पूर्व''

• 18 रोजी दाभाळ सोमनाथ देवस्थानात ‘शिवआलिंगन''

• 18 रोजी काले - धुकरकोंड येथे ‘इथे ओशाळला मृत्यू‘

• 19 रोजी फर्मागुढी गोपाळ गणपती देवस्थान ‘श्रीमान योगी‘

• 19 रोजी पर्वरी ‘आकाश मिठी‘

• 20 रोजी रवींद्र भवन साखळी ‘स्वराज्य धर्म''

• 20 रोजी दोन माड केरी ‘इथे ओशाळला मृत्यू‘

• 21 रोजी हेडलँड सडा वास्को ‘स्वराज्य धर्म''

• 21 रोजी कुंडई सार्वजनिक गणेशोत्सव सभागृह ‘श्रीमान योगी‘

• 21 रोजी साकोर्डा तळावलीकर हायस्कूल ‘करीन ती पूर्व''

• 22 रोजी कुडचडे रवींद्र भवन ‘स्वराज्य धर्म''

• 22 रोजी शिरोडा पंचायत सभामंडप ‘श्रीमान योगी‘

• 23 रोजी कासवाडा - तळावली गोपाळकृष्ण गजानन देवस्थान ‘गरुड झेप''