Pilgao Farmers Protest Vedanta Truck Mining Dispute

डिचोली: खाणबंदी काळापासून म्हणजे गेल्या १२ वर्षांपासून आर्थिक संकटात अडकलेले डिचोलीतील ट्रकमालक पुन्हा एकदा अडचणीत आले आहेत. पिळगावमधील शेतकऱ्यांच्या सध्याच्या आंदोलनाचा ट्रकमालकांना फटका बसला असून सुरळीतपणे खनिज वाहतूक कधी एकदाची सुरू होते. त्याची ट्रकमालकांना प्रतीक्षा लागून राहिली आहे.

खाण व्यवसाय पूर्वपदावर येण्यासाठी खाण कंपनी व्यवस्थापनाने खाणपट्ट्यातील शेतकऱ्यांच्या प्रश्नावर सर्वमान्य तोडगा काढावा, अशी मागणी डिचोली ट्रकमालक संघटनेने केली आहे. सरकारनेही याप्रश्नी जातीने लक्ष घालून खाण व्यवसाय जाग्यावर घालावा, अशी मागणी ट्रकमालकांनी केली आहे.

आपल्या मागण्या पुढे करुन पिळगावमधील शेतकऱ्यांनी गेल्या बुधवारपासून माठवाडा-सारमानस जंक्शनजवळ ‘रस्ता बंद’ आंदोलन सुरू केले आहे. आंदोलनाचा सहावा दिवस असून अद्याप ''वेदांता''च्या खाणीवरील खनिज वाहतूक बंद आहे.

ट्रक खाताहेत धूळ

डिचोली खाण ब्लॉक अंतर्गतची ''वेदांता''ची खाण सुरू झाल्यानंतर गेल्या जुलै महिन्यापासून भर पावसाळ्यात डिचोलीत खनिज वाहतूक सुरू झाली होती. जवळपास १७३ ट्रक खनिज वाहतुकीसाठी रस्त्यावरउतरले होते.

मध्यंतरी किरकोळ अपवाद वगळता गेल्या आठवड्यापर्यंत खनिज वाहतूक सुरळीतपणे चालू होती. मात्र पिळगावमधील शेतकऱ्यांच्या आंदोलनामुळे गेल्या सहा दिवसांपासून खनिज वाहतूक बंद आहे. परिणामी खाणीवरील खनिज ट्रकांची धडधड थांबली असून, गेल्या सहा दिवसांपासून खनिज ट्रक धूळ खात आहेत. काही ट्रक तर डिचोलीतील खाणीवरच पार्क करून ठेवण्यात आले आहेत.