पणजी: मांडवी नदीत प्रवासी बोटला आग लागण्याची घटना शनिवारी (३१ मे) पहाटेच्या सुमारास उघडकीस आली. बिठ्ठोण जेटीवरील एमव्ही के-कॅट या प्रवासी बोटला आग लागली. आगीची घटना घडली त्यावेळी बोटमध्ये कोणी प्रवासी अथवा कर्मचारी नसल्याने मोठी दुर्घटना टळली.

मिळालेल्या प्राथमिक माहितीनुसार, बिठ्ठोण जेटीवरील एमव्ही के-कॅट ही प्रवासी बोट उभी करण्यात आली होती. या बोटला अचनाक आग लागली, जोरदार वाऱ्यामुळे आग अधिकच भडकली आणि बोटच्या संपूर्ण भागात ती पसरली. आगीने बोटचा पूर्ण ताबा घेतला. पाण्याच्या प्रवाहामुळे ही बोट हळुहळू बंदर खात्याच्या कार्यालयापर्यंत आली. अखेर या घटनेची माहिती बंदर खाते आणि अग्निशमन दलाच्या जवानांना देण्यात आली.

बंदर खात्याचे कर्मचारी आणि अग्निशमन दलाच्या जवानांना बोटीला लागलेली आग आटोक्यात आणली. या बोटीवर सुदैवाने कोणी नसल्याने मोठा अनर्थ टळला. दरम्यान, बोटीला आग कशामुळे लागली याचे कारण अद्याप समोर आलेले नाही. पोलिस याप्रकरणचा अधिक तपास करत आहेत.