Goa Night Parties: उत्तर गोव्यातील किनारीपट्ट्यातील रात्री देखील दिवसा प्रमाणे झगमगाट झाली आहे. मध्यरात्री ते पाहाटेपर्यंत येथे मोठ्या आवाजात पार्ट्या सुरू असून सर्व नियम धाब्यावर बसवले जात आहेत. मुख्य म्हणजे पार्ट्या सुरू असलेल्या ठिकाणीपासून पोलिस ठाणे हाकेच्या अंतरावर असूनही दोन किलोमीटरच्या अखत्यारीत एकही पोलिस नाही. परिणामी ध्वनी प्रदूषणसंदर्भात न्यायालयीन आदेशाची पायमल्ली होत आहे.

रात्री 10 वाजेपर्यंत संगीत बंद करण्याचा आदेश उच्च न्यायालयाने दिल्यापासून पोलिस यंत्रणेने त्याची अंमलबजावणी सुरू केल्याची माहिती सरकारकडून दिली जात आहे. लग्न सोहळे, सांस्कृतिक कार्यक्रम 10 वाजल्यानंतर वेळ झाल्याचे सांगून बंद केले जात आहेत. परंतु किनारपट्टी भागात हा नियम लागू होत नसल्याचे स्पष्ट झाले आहे. मुख्य म्हणजे एकाच ठिकाणी पाच ते सहा पार्ट्या होत आहेत. पार्ट्यांमध्ये वाजणाऱ्या कर्कश संगीतामुळे प्रचंड ध्वनी प्रदूषण होत आहे. पार्ट्यांवर नियंत्रण ठेवण्यासाठी एकही सरकारी यंत्रणेतील कर्मचारी तेथे उपस्थित नसल्याने न्यायालयीन आदेश कागदोपत्रीच मर्यादित राहिला आहे.

सायंकाळी 7 वा. किनारपट्टी सुरू झाल्यानंतर पाहाटे 6 पर्यंत देखील काही पार्ट्या चालतात. पार्ट्यांना येणाऱ्यांमध्ये 98 टक्के ग्राहक पर्यटक असून एका व्यक्तीला प्रवेश घेण्यासाठी शुल्क 8 हजार ते 15 हजारपर्यंत आहे. त्यामुळे सर्वसामान्‍य आणि स्थानिक व्यक्ती येथे येण्याचा सवालच येत नाही. तरी पार्ट्यांना जाण्यासाठी देशी व विदेशी पर्यटकांनी गर्दी केली आहे. एरवी पोलिस रात्री गस्त घालतात पण येथे मध्यरात्रीदेखील पोलिस वाहन दिसत नाही. पर्यटक रस्त्यावरच राहून धूम्रपान आणि मद्यपान करत आहेत, मात्र त्यांच्यावर नियंत्रण ठेवण्यासाठी तेथे कोणीही नाही. पोलिसांनी जणू सगळी जबाबदारी पार्ट्यांमध्ये असलेल्या बाऊंसरवरती टाकल्याची टीका होत आहे.