पणजी : तब्बल 15 लाखांची फसवणूक केल्या आरोपाखाली पणजी पोलिसांनी एका आरोपीला अटक केली आहे. वामन कुमार असं या आरोपीचं नाव असून महाराष्ट्रातील एका व्यक्तीला त्याने सरकारचं नाव वापरुन गंडा घातल्याचं स्पष्ट झालं आहे.

वामन कुमार नावाच्या एका व्यक्तीने महाराष्ट्रातील अजित कुडे नामक व्यक्तीची 14.85 लाखांची फसवणूक केली आहे. कचरा व्यवस्थापन आणि पर्यावरणासंदर्भात काम करणाऱ्या एका व्यावसायिकाची लूट केल्याप्रकरणी पोलिसांनी वामन कुमारला बेड्या (Arrest) ठोकल्या आहेत. धक्कादायक बाब म्हणजे ही फसवणूक करताना आरोपीने गोवा सरकारचा प्रतिनिधी असल्याचा बनाव केल्याचंही आता तपासात समोर आलं आहे.

आरोपीने अजित कुडे यांना फोन केला आणि आपण गोवा राज्य सरकारचा (Goa Government) प्रतिनिधी असल्याचं भासवलं. तसंच टेंडर प्रक्रियेत मदत करण्याचा बनाव करत आपली कचरा व्यवस्थापन मंत्र्याशी ओळख असल्याचंही सांगितलं. दाखल केलेल्या तक्रारीत आरोपीने एका अनोळखी व्यक्तीशी संभाषण घडवल्याचंही नमूद करण्यात आलं आहे, ज्याने आपण मंत्री असल्याचा दावा केला होता. यानंतर चिखलीत बायोगॅस प्लांट बांधण्यासाठी टेंडरसाठी 14.85 लाखांची रक्कम देण्यास सांगितलं. मात्र जेव्हा आपली फसवणूक (Fraud) झाल्याचं कुडे यांना समजलं त्यांनी पोलिसात धाव घेतली.