वास्को: वास्को - मुरगाववासीयांवर राज्य कदंब मंडळाचा नेहमीच अन्याय होतो. याचे प्रत्यक्ष उदाहरण सोमवार व मंगळवारी पणजी कदंब बस स्थानकावर सायंकाळी ५ ते ६ च्या सुमारास पाहायला मिळते. बस उशिरा का सोडली, असे विचारल्यावर उडवाउडवीची उत्तरे डेपो व्यवस्थापकांकडून प्रवाशांना ऐकावी लागतात.

पणजी ते मडगाव दहा मिनिटांत दोन बसेस प्रवाशांना घेऊन जातात. तर अर्ध्या तासाने एक बस वास्कोला जाते, तीही तुडूंब भरलेल्या अवस्थेत सोडण्यात येते. एकप्रकारे ‘कदंब’कडून वास्कोवासीयांचा छळ होत असल्याच्या प्रतिक्रिया व्यक्त होत आहेत.

राज्य कदंब मंडळातर्फे सर्व सामान्यांसाठी प्रत्येक तालुक्यातील गावामध्ये बस सेवा उपलब्ध करून देण्यात आली आहे. परंतु गेल्या काही दिवसांपासून पणजी ते वास्को बस सेवा सायंकाळच्या सत्रात, खास करून वास्कोला जाणाऱ्या प्रवाशांचे प्रचंड हाल होत आहेत.

कामावरून येणाऱ्या बरोबर नियमित पणजीत कामाला जाणाऱ्यांना सायंकाळी वास्कोची बस उपलब्ध होत नसल्याने ताटकळत उभे राहावे लागते, असे काही प्रवाशांनी सांगितले.