Goa News: पंचायतींनी सरकारला माहिती न दिल्याने पंचायतमंत्री माविन गुदिन्हो यांच्यावर मागावून माहिती मिळवून सभागृह पटलावर ठेवतो, असे सांगण्याची वेळ विधानसभेत आली. यामुळे पंचायती सरकारलाही जुमानत नसल्याचे दिसून येते, असा शेरा बाणावलीचे आमदार वेन्झी व्हिएगश यांनी मारला.

व्हिएगश यांनी स्थानिक पातळीवरील कर चुकवेगिरीचा विषय मांडण्यासाठी पंचायती आकारत असलेल्या कराची माहिती तालुकावार मागितली होती. त्यांचा प्रश्न चर्चेला आला असताना त्यांनी तिसवाडी तालुक्यातील पंचायतींच्या कराची माहिती का दिली नाही, अशी विचारणा केली. त्यावर गुदिन्हो यांनी देतो असे सांगितले. त्यांना अधिकारी कक्षात असलेल्या पंचायत संचालक सिद्धी हळर्णकर या माहिती देतील अशी अपेक्षा असावी.

मात्र त्यांच्याकडून काही माहिती मिळाली नाही. त्यावर व्हिएगश यांनी विधानसभा अधिवेशन संपेपर्यंत तरी माहिती मिळेल काय अशी खोचक विचारणा केली. गुदिन्हो यांनी माहिती मिळवून हे अधिवेशन संपण्याआधी माहिती सभागृह पटलावर ठेवतो असे सांगत सुटका करून घेतली.

व्हिएगश म्हणाले, घरे भाड्याने दिली जातात पण त्याचा कर पंचायतींना दिला जात नाही. बाहेरून आलेले जास्त करून असे वागतात. वीज पाण्याच्या वापरावरून तेथे घर भाड्याने दिले जाते की नाही हे समजू शकते.

सांतआंद्रेचे आमदार वीरेश बोरकर यांनी एकाच पंचायत क्षेत्रात दोन वेगवेगळ्या ठिकाणांसाठी घरपट्टीचा दर वेगवेगळा कसा असू शकतो, असा प्रश्न उपस्थित केला. वेळ्ळीचे आमदार क्रुझ सिल्वा म्हणाले, पंचायत संचालनालयाने घरपट्टीचे नवे दर लागू केले आहेत. पण पंचायतींनी केव्हापासून ते लागू करावे, हे स्पष्ट करावे.

‘त्या’ सरपंचावर कारवाई!

या चर्चेला उत्तर देताना गुदिन्हो म्हणाले, करविषयक माहिती डिजीटल स्वरूपात उपलब्ध केली जाईल. त्यानंतर कर न भरणाऱ्यांना पंचायतीकडून आवश्यक ती प्रमाणपत्रे देणे बंद केले जाणार असल्याचे सांगितले. ते म्हणाले, माजोर्डा पंचायतीच्या महिला सरपंचाचे वडील नोटीस घेऊन अनेक वर्षे अस्तित्वात असलेल्या हॉटेलांना नोटीसा नेऊन देतात. ते हॉटेल मोजण्यास पुढाकार घेतात. त्याविषयीच्या तक्रारी आल्या आहेत. त्या सरपंचावर कारवाई केली जाणार आहे.