गोव्यातील एका युवकाला फेब्रुवारी महिन्यात बेदम मारहाण झाली होती. त्यानंतर त्याला उपचारासाठी दवाखान्यात दाखल करण्यात आले होते. पण, त्याची मृत्युशी झुंज अपयशी ठरली आहे. तीन महिन्यांनंतर अखेर रूग्णालयात निधन झाले. सर्वसामान्य कुटूंबातील या मुलाला न्याय मिळावा, अशी मागणी स्थानिकांनी केली आहे.

या प्रकरणी डॉक्टरांच्या सर्टिफिकेटसह लवकरच पोलिसांची भेट घेणार असल्याचे स्थानिकांनी म्हटले आहे.

(Goan youth beaten up before 3 months eventually died)

19 फेब्रुवारी रोजी रात्री साडेबाराच्या सुमारास ही मारहाणीची घटना झाली होती. या मारहाणीत त्याला डोक्यावर जखम झाली होती. तथापि, सिटी स्कॅनमध्ये काही आढळून आले नव्हते. पण एमआरआय स्कॅनमध्ये डोक्यात मारहाण झाल्याचे तसेच मेंदूत पस झाल्याचे निदर्शनास आले. संसर्ग पसरून मृत्यू झाल्याचे डॉक्टरांनी म्हटले आहे.

जीएमसीमध्ये त्याला दाखल केले होते. त्याला मारहाण करणारे लोक आगशी येथील होते. पोलिसांकडे या मारहाणीचे व्हिडिओ फुटेज आहे, असे स्थानिकांनी सांगितले.

तो मुलगा एका बुलेट बाईकवर हात ठेऊन उभा होता. ती बुलेट पडली. त्यामुळे त्या मुलाला मारहाण करण्यात आली. नुकसान भरून देतो, असे सांगुनही त्याचे कुणी ऐकले नाही. त्याला बेदम मारहाण करण्यात आली. यात त्याच्या डोक्याला दुखापत झाली होती.

दरम्यान, टोंक परिसरातील नागरिक आणि या तरूणाच्या नातेवाईकांनी त्याला मारहाण करणाऱ्यांवर खुनाचा गुन्हा दाखल करावा, अशी मागणी केली आहे.