Goa Police: राज्यात महिलांवरील अत्याचाराच्या गुन्ह्यांत दिवसेंदिवस वाढ होत असल्याने पणजी महिला पोलिस स्थानकात त्याची संख्या वाढत आहे. मात्र प्रकरणांच्या तपासकामासाठी आवश्‍यक असलेले मनुष्यबळ या पोलिस स्थानकात नसल्याने निरीक्षकांना एकहाती लढा द्यावा लागत आहे.

या पोलिस स्थानकात असलेल्या दोन महिला उपनिरीक्षक या रजेवर आहेत. त्यामुळे त्यांच्या बदली कर्मचारी देण्यात न आल्याने पोलिस निरीक्षकांवर कामाचा ताण पडत आहे.

पणजीतील महिला पोलिस स्थानकात एका पोलिस निरीक्षकासह दोन उपनिरीक्षक तसेच दहा महिला कॉन्स्टेबल्स आहेत. महिलांवरील अत्याचार तसेच कौटुंबिक समस्यासंदर्बातची प्रकरणे ही महिला पोलिस स्थानकात येतात. त्यामुळे या प्रकरणांची चौकशी करून त्यावर निर्णय घेण्यातच अधिकाऱ्यांचा वेळ जात असतो.

न्यायालयातील खटल्यांवरील सुनावणीवेळी उपस्थिती लावणे, गुन्हा नोंद असलेल्या प्रकरणातील साक्षीदारांच्या जबान्या नोंदवणे, पुरावे जमा करणे तसेच संशयिताच्या जामिनावरील अर्जाला उत्तरे सादर करणे, अशा अनेक कामांमुळे महिला पोलिस स्थानकाच्या निरीक्षकांना तारेवरची कसरत करण्याची वेळ आली आहे.

एकमेव निरीक्षक; त्यावरच वाढता भार

महिला पोलिस स्थानकात महिलांवरील बलात्कार व लैंगिक अत्याचाराची तसेच अल्पवयीन मुलांचे लैंगिक शोषण यासंदर्भातचे गुन्हे नोंद होऊन तपासकाम सुरू आहे. या स्थानकातील दोन उपनिरीक्षकांकडे असलेल्या प्रकरणांचे तपासकाम त्या आजारपणाच्या रजेवर गेल्याने रखडले आहे. त्या प्रकरणांचा भार आता एकमेव पोलिस निरीक्षकावर पडला आहे.

उपनिरीक्षक किंवा निरीक्षक पदावरील अधिकारीच या प्रकरणांचा तपास करू शकतो, त्यामुळे या उपनिरीक्षकांकडे असलेल्या प्रकरणांचे तपासकाम करण्यासाठी अधिकारीच नसल्याने अनेक अडचणींना सामोरे जावे लागत आहे.

बदली अधिकारी देण्याकडे दुर्लक्ष

या स्थानकात मनुष्यबळाची कमतरता आहे, त्याची माहिती वरिष्ठ पोलिस अधिकाऱ्यांना आहे. मात्र, बदली पोलिस अधिकारी देण्याबाबत काहीच हालचाली झालेल्या नाहीत. या पोलिस स्थानकासाठी एकच वाहन असल्याने तपासकामातही अनेक अडचणींना सामोरे जावे लागत आहे. त्याचा परिणाम तपासकामावर होत आहे.