Kadamba EV Cashless Bus Service

पणजी: राजधानीत विजेवरील बससेवा मागील आठवड्यात कॅशलेस करण्याचा निर्णय घेतला होता, मात्र प्रवाशांकडून अपेक्षित प्रतिसाद न मिळाल्याने कदंब वाहतूक महामंडळाने ही सेवा पुढे ढकलली होती. आता ही बससेवा गुरुवारपासून सुरू होणार असल्याची माहिती महामंडळातील अधिकाऱ्यांनी दिली. पहिल्या टप्प्यात ७ मार्गांवरील बससेवा कॅशलेस होणार आहे.

कॅशलेस सेवेसाठी स्मार्ट ट्रान्झिट कार्ड अनिवार्य आहे. कार्ड नसेल तर यूपीआयच्या माध्यमातूनही तिकीट काढता येणार आहे. प्रवाशांसाठी स्मार्ट ट्रान्झिट कार्ड करण्याची प्रक्रिया सुरू झाली असून ती कायमची सुरूच राहणार आहे. तसेच कार्ड नसलेल्या प्रवाशांना यूपीआयद्वारे तिकीट खरेदीची सुविधा उपलब्ध करण्यात आली आहे.

पणजी स्मार्ट सिटी डेव्हलपमेंट लिमिटेड आणि कदंब वाहतूक महामंडळाने एकत्रितपणे शहरातील काही विजेवर चालणाऱ्या बससेवा कॅशलेस करण्याचा निर्णय घेतला होता. मात्र, स्मार्ट ट्रान्झिट कार्डला अपेक्षित प्रतिसाद न मिळाल्याने हा निर्णय काहीसा पुढे ढकलण्यात आला होता, अशी माहिती कदंब वाहतूक महामंडळाचे अध्यक्ष उल्हास तुयेकर यांनी दिली.

''टूमोक'' या मोबाईल अ‍ॅपच्या मदतीने क्यूआर कोडद्वारे तिकीट बुकिंगची सोयही उपलब्ध आहे. स्मार्ट सिटीच्या अधिकाऱ्यांच्या माहितीनुसार, अ‍ॅपद्वारे बसचे रिअल-टाइम ट्रेकिंग, क्यूआर कोड आधारित तिकीट बुकिंग आणि कॉन्टॅक्टलेस पेमेंट यांसारख्या सुविधांचा लाभ घेता येईल. विजेवर चालणाऱ्या बस सेवा कंडक्टरशिवाय चालवणे हे पणजी स्मार्ट सिटीचे लक्ष्य असल्याचेही अधिकाऱ्यांनी स्पष्ट केले आहे.