पणजी: राजधानी पणजीतील मिरामार सर्कलपाशी सायं. ६ वा. राज्यातील विविध भागांतील तसेच देशातील इतर काही राज्यांतून आलेल्या तरुणाईसोबत काही नागरिक एकवटायला सुरवात झाली व शेकडोंचा जमाव हजारोंचा झाला.

‘इन्कलाब जिंदाबाद’, ‘भारत माता की जय’चे नारे यावेळी घुमू लागले. या जमलेल्या तरुणाईला ‘उजवाड’ या ‘एनजीओ’च्या कार्यकर्त्यांनी आमंत्रित केले होते.

समाजकार्यकर्ते सोनम वांगचुक यांच्या समर्थनार्थ आणि शिक्षणमंत्री धर्मेंद्र प्रधान यांनी तत्काळ राजीनामा द्यावा, देशाची शिक्षण व्यवस्था सुधारावी, या मागणीसाठी नागरिक जमले होते. हातात मेणबत्ती आणि ‘इन्कलाब जिंदाबाद’चा नारा देत रस्त्याच्या एकाबाजूने आझाद मैदान गाठले. आझाद मैदानावर हजारो मेणबत्त्या आणि मोबाईलच्या टॉर्च पेटवत तरुणाईने सोनम वांगचुक यांना समर्थन दर्शविले.

दरम्यान, मोर्चाला समर्थन देण्यासाठी आमदार वीरेश बोरकर, ‘आप’चे गोवा प्रमुख वाल्मिकी नाईक, ॲड. हृदयनाथ शिरोडकर, प्रसाद म्हांबरे, रामा काणकोणकर, राजदीप नाईक व इतर सामाजिक कार्यकर्ते, पर्यावरणप्रेमी, प्राध्यापक मोठ्या संख्येने उपस्थित होते.

‘उजवाड’ काय करते?

‘उजवाड’ ही संस्था समाजिक आणि पर्यावरणसंबंधी कार्य करणारी संस्था आहे. या संस्थेत एकूण ३० सभासद सक्रियपणे काम करतात. या संस्थेच्या अध्यक्ष सँड्रा परेरा असून सचिव अमरीन शेख आहेत. संस्थेने आपल्या सोशल मीडिया पेजद्वारे तरुणाईला हाक देऊन मोर्चात सहभागी होण्याचे आवाहन केले होते.

ऐनवेळी नाकारली परवानगी!

या मोर्चासाठी आयोजकांनी संबंधित प्रशासनाकडून परवानगी मागितलेली होती. त्यांना परवानगीही देण्यात आली होती. मात्र, ऐनवेळी ही परवानगी नाकारण्यात आली; पंरतु ‘उजवाड’ संस्थेने मोर्चा काढला. हजारोंच्या जमावाला आवरणे पोलिसांनादेखील शक्य नव्हते. हा मोर्चा इतक्या नियोनबद्ध पद्धतीने आयोजित केला होता की एवढा जमाव असूनही कोणत्याही प्रकारचे गैरवर्तन झाले नाही. मोजक्याच वक्त्यांनी भाषणे केली, मेणबत्ती पेटवल्या आणि राष्ट्रगीताने मोर्चाची सांगता करण्यात आली.