पणजी: पणजी महानगरपालिकेच्या महापौरपदी अपेक्षेप्रमाणे रोहित मोन्सेरात यांची तर उपमहापौरपदी वसंत आगशीकर यांची बिनविरोध निवड झाली. महापौरपदाच्या या कार्यकाळात पणजीतील प्रलंबित समस्या सोडवणे आणि निवडणुकीत जनतेला दिलेली आश्‍‍वासने पूर्ण करण्यावर करणे यावर आपला भर असेल, असे रोहित यांनी निवडीनंतर पत्रकारांशी बोलताना स्‍पष्‍ट केले.

महापौर आणि उपमहापौरांच्‍या निवडीनंतर मनपाच्‍या नवनिर्वाचित नगरसेवकांनाही शपथ देण्‍यात आली. काही दिवसांपूर्वी झालेल्‍या मनपाच्‍या निवडणुकीत भाजप नेते तथा पणजीचे आमदार बाबूश मोन्‍सेरात यांच्‍या पॅनलने ३० पैकी २७ जागा जिंकून निर्विवाद वर्चस्‍व मिळविले.

त्‍यानंतर महापौरपदासाठी रोहित मोन्‍सेरात आणि उपमहापौरपदासाठी वसंत आगशीकर यांनी अर्ज दाखल केले होते. या पदांसाठी दोघांचेच अर्ज आल्‍याने त्‍यांची बिनविरोध निवड झाल्‍याचे सोमवारी जाहीर करण्‍यात आले. दरम्‍यान, मनपाच्‍या स्‍थायी, बाजार आणि सार्वजनिक बांधकाम समित्‍यांचीही सोमवारी निवड करण्‍यात आली.

स्थायी समितीवर रोहित मोन्सेरात, विठ्ठल चोपडेकर, रुपेश हळर्णकर, उदय मडकईकर, कबीर मखिजा आणि निकिता नाईक तर बाजार समितीवर कॅरोलिना पो, अस्मिता केरकर, किशोर शास्त्री, कीर्ती साखळकर, सिल्वेस्टर फर्नांडिस आणि विद्या गडकर यांची नियुक्ती केली. सार्वजनिक बांधकाम समितीवर शुभम चोडणकर व इतरांची नेमणूक करण्‍यात आली आहे.