मडगाव : सध्याचे पणजी महापालिका आयुक्त आणि पूर्वीचे सहाय्यक पासपोर्ट संचालक आग्नेल फेर्नांडिस यांच्यासह त्यांची पत्नी सिंथीया यांच्याविरोधात आज दक्षिण गोव्याचे अतिरिक्त सत्र न्यायाधीश व्हिन्सेंट डिसिल्वा यांनी भ्रष्टाचार (Corruption) प्रतिबंधक कायद्याच्या 13 (2) व 13 (ई) कलमाखाली आरोप निश्चित केले.

दोन्ही संशयितांनी आपल्यावरील आरोप नाकारल्याने आता या प्रकरणी साक्षी पुरावे नोंदवून घेण्याची प्रक्रिया सुरू होणार आहे. या प्रकरणी सीबीआयने (CBI) आरोपपत्र दाखल केले होते.

ऑक्टोबर 2013 ते मार्च 2016 या दरम्यान पासपोर्ट कार्यालयात उप संचालक असताना फेर्नांडिस यांनी गैरमार्गाने पैसे कमविले असा त्यांच्यावर आरोप असून त्यांच्या घरावर छापा टाकला असता ज्ञात स्रोतापेक्षा अधिक संपत्ती त्यांच्याकडे सापडली. ही मालमत्ता बेहिशोबी असल्याचा सीबीआयचा दावा आहे.