पणजी: कला अकादमीच्या दर्यासंगमावर शुक्रवारपासून २४ व्या ‘लोकोत्सवा''ला प्रारंभ झाला आहे. दरवर्षीप्रमाणे शनिवारी आणि रविवारी या महोत्सवामुळे भाऊसाहेब बांदोडकर मार्गावर वाहतूक कोंडी होत असते. त्यामुळे उद्या व परवा या मार्गावरून सायंकाळच्या वेळी जाणे कटाक्षाने टाळणे आणि आपणही वाहतूक कोंडीचे एक घटक बनू नये, याचा विचार वाहनधारकांना करावा लागणार आहे.

दरवर्षीप्रमाणे कला अकादमीच्या दर्यासंगमावर भरणाऱ्या ‘लोकोत्सव’चे एक आकर्षण राहिले आहे. कला व संस्कृती खात्याच्यावतीने या लोकोत्सवाचे आयोजन होत आहे. बांदोडकर मार्गाच्या बाजूला या महोत्सवाचे ठिकाण असल्याने या महोत्सवासाठी लोकांची दरवर्षी मोठी गर्दी असते.

शनिवारी आणि रविवारी विशेषकरून सुटीचा दिवस असल्याने सायंकाळ या महोत्सवात खरेदी आणि सांस्कृतिक कार्यक्रमाचा आनंद लुटण्यासाठी अनेकांची पावले पणजीच्या दिशेने वळतात. खरेतर दरवर्षीचा अनुभव घेता लोकांनीही या कार्यक्रमाला केव्हा आणि कधी जावे याचे नियोजन करणे आवश्यक आहे. बांदोडकर मार्गावर कोंडी झाल्यानंतर पोलिसांना दोष देण्याशिवाय वाहनधारकांना पर्याय नसतो. सध्या पणजीत स्मार्ट सिटीची कामे सुरू झाली आहेत, त्यामुळे वाहतूक वळवण्यात आली आहे.