पणजी: मुख्य साक्षीदार तथा तक्रारदार महिलेने न्यायालयात जबाब देण्यास नकार दिल्यामुळे आरोपीस संशयाचा लाभ देत पणजी येथील फास्ट ट्रॅक विशेष न्यायालयाने (पॉक्सो) कार्ल हेंड्रिक्स (वय ३८) यांना निर्दोष मुक्त केले आहे.

आरोपीवर बलात्कार आणि लैंगिक अत्याचाराचा आरोप नोंद करण्यात आला होता. या प्रकरणाचा निकाल न्यायाधीश दुर्गा मडकईकर यांनी सुनावला. महिलेचा जबाब उपलब्ध नसल्याने आणि सादर करण्यात आलेले पुरावे अपुरे व विसंगत असल्याचे न्यायालयाने आदेशात नमूद केले.

ही घटना ४ मार्च २०१९ रोजी उत्तर गोव्यात घडली होती. तक्रारदार महिलेने तक्रारीत म्हटले होते, की ‘एनजीओ’शी संबंधित असलेल्या आरोपी हेंड्रिक्स यांनी मदतीच्या बहाण्याने तिच्या घरी जाऊन लैंगिक अत्याचार केला होता.

अनेकवेळा न्यायालयीन समन्स दिल्यानंतरही तक्रारदाराने सांगितले, की ती आजारी असल्याने न्यायालयात येऊ इच्छित नाही आणि प्रकरण पुढे नेऊ इच्छित नाही. तसेच या प्रकरणातील केंद्रीय न्यायवैज्ञानिक प्रयोगशाळेचा अहवाल हरवला असल्याचे नोंदविण्यात आले आणि तो न्यायालयासमोर सादर झाला नाही, असे न्यायालयाने आदेशात अधोरेखित केले.

फोन, कॉल डेटा नाही

तपासादरम्यान तक्रारदार महिलेचा फोन, कॉल डिटेल रेकॉर्ड, लोकेशन डेटा गोळा करण्यात आले नाहीत; घटनास्थळी कोणतीही फॉरेन्सिक टीम पाठविण्यात आली नव्हती.

न्यायालयात जबाब देणाऱ्या डॉक्टरांनी स्वतः तपासणी केली नव्हती, त्यांनी केवळ दुसऱ्या डॉक्टरच्या स्वाक्षरीची ओळख दिली. वैद्यकीय अहवालात कोणतीही ताजी दुखापत आढळली नाही, असेही न्यायालयाने नमूद केले.