Bhoma Villagers Protest Against Expansion of Highway: पणजी-बेळगाव महामार्गावरील नियोजित महामार्ग रूंदीकरणाला भोमा येथे रहिवाशांचा विरोध आहे. येथील काही घरे या रूंदीकरणात जाणार असल्याने येथे रूंदीकरण करण्यास ग्रामस्थ विरोध करत आहेत.

रस्ता रूंदीकरणाऐवजी बायपास करा, अशी मागणी ग्रामस्थांची आहे. त्याच पार्श्वभुमीवर आज, बुधवारी भोमा ग्रामस्थांनी सरपंचांना घेराव घातला.

ग्रामस्थांनी सरपंचांना घेराव घालत बायपाससाठीचा लढा आणखी तीव्र करणार असल्याचा निर्धार व्यक्त केला. भोमा ग्रामपंचायतीच्या सरपंचांनी राष्ट्रीय महामार्गाच्या विस्तारीकरणाबाबत चर्चा केली. यावेळी ग्रामस्थांनी ठाम भूमिका घेत विस्तारीकरणास विरोध दर्शविला.

ग्रामस्थ म्हणाले की, आम्हाला थ्रीडी प्रेंझेटेशन नको, आम्ही रस्ता रूंदीकरण करू देणार नाही, आमची मागणी आहे बायपास करा, असे ग्रामस्थांनी स्पष्ट केले.

रविवारीच भोमावासीयांनी महामार्गाच्या रूंदीकरणाला विरोध करत, बायपासच्या मागणीसाठी रॅली काढली होती. 'आमका जाय, आमका जाय, बायपास आमका जाय,' अशा घोषणा देत मोठ्या संख्येने ग्रामस्थ या रॅलीत सहभागी झाले होते.

या वेळी क्रीडा आणि सांस्कृतिक मंत्री गोविंद गावडे हे देखील उपस्थित होते. त्यांनी स्थानिकांच्या बाजूने राहण्याची ग्वाही दिली होती.