Goa INEX 2023: गोव्यात होणाऱ्या इंडिया इंटरनॅशनल इनोव्हेशन अँड इन्व्हेन्शन एक्सपो (INEX) 2023 या प्रदर्शनात देशातील आणि परदेशातील एकूण 150 हून अधिक इनोव्हेशन्स (नवकल्पना) मांडले जाणार आहेत.

पुढील महिन्यात दक्षिण गोव्यात हे प्रदर्शन भरणार आहे. यात देशविदेशातील नवोन्मेषक सहभागी होणार आहेत.

सर्व क्षेत्रांतील नवकल्पना प्रदर्शित केल्या जातील. हा कार्यक्रम दक्षिण गोव्यातील फातोर्डा येथील डॉन बॉस्को कॉलेज ऑफ इंजिनीअरिंग येथे होणार आहे.

गोवा स्टेट इनोव्हेशन कौन्सिलचे अध्यक्ष जोस मॅन्युएल नोरोन्हा यांनी सांगितले की, 9 ते 11 नोव्हेंबर 2023 या कालावधीत होणाऱ्या या कार्यक्रमात भारतासह पोलंड, मलेशिया, इराण, इंग्लंड, रशिया आणि सायप्रससह इतर देशांतील नवसंशोधक सहभागी होणार आहेत.

गोवा स्टेट इनोव्हेशन कौन्सिल या कार्यक्रमाच्या आयोजकांपैकी एक आहे. गोवा सरकारचा विज्ञान, तंत्रज्ञान आणि कचरा व्यवस्थापन विभाग, इंडियन इनोव्हेटर्स असोसिएशन आणि एक पोलिश कंपनी IBS ग्लोबल या कार्यक्रमाचे सह-आयोजक आहेत.

नोरोन्हा म्हणाले की कझाकस्तान, मकाऊ, थायलंड, पोर्तुगाल आणि अमेरिका यांसारख्या इतर देशांचाही सहभाग अपेक्षित आहे.

इनोव्हेटर समुदायातील ज्ञानाच्या देवाणघेवाणीचा एक भाग म्हणून, प्रदर्शनादरम्यान टॉप 150 नवकल्पना प्रदर्शित आणि प्रकाशित केल्या जातील. याशिवाय गोव्यातील नवकल्पना देखील या प्रदर्शनात असतील.