पणजी: राज्यात गेले दोन दिवस दमदारपणे बरसलेल्या पावसाने राज्यभर पूरस्थिती निर्माण केली होती. शुक्रवारी दुपारपर्यंत पाऊस ओसरला. मात्र, काही प्रमाणात रिपरिप सुरूच होती. राज्यात मागील २४ तासांत सर्वाधिक ९१.२ मिमी म्हणजेच ३.५९ इंच पावसाची नोंद वाळपई येथे करण्यात आली.

राज्यभरात सरासरी एकूण ६१ मिमी म्हणजेच २.४० इंच पावसाची नोंद करण्यात आली. आतापर्यंत राज्यात एकूण ३,१५२ मिमी म्हणजेच १२४ इंच पावसाची नोंद केली असून सरासरी पावसाच्या तुलनेत तब्बल ५६ टक्के अधिक पाऊस पडला आहे. आतापर्यंत राज्यात सर्वाधिक पाऊस वाळपई येथे १५५.१० इंच इतका पडला आहे.

आज ऑरेंज अलर्ट

कोकणात समुद्र किनाऱ्यालगतच्या भागात कमी दाबाचा पट्टा सक्रिय झाल्याने तसेच पश्‍चिम बंगाल येथे चक्रीय वाऱ्याची स्थिती निर्माण झाल्याने शनिवारी देखील राज्यात जोरदार पावसाची शक्यता असल्याने गोवा वेधशाळेने ऑरेंज अलर्ट जारी केला आहे.

राज्यातील धरणे फुल्ल

राज्यातील सर्वच धरणांत मुबलक प्रमाणात पाणी साठले आहे. साळावली, अंजुणे तसेच इतरही धरणांतून पाणी सोडले जात आहे. साळावली, चापोली, आमठाणे, पंचवाडी, गांजे येथील धरणे फुल्ल झाली आहेत, तर अंजुणे धरणातूनही पाण्याचा विसर्ग सुरू झाला आहे.

गेल्या २४ तासांतील पर्जन्यमान

वाळपई : ९१.२ मिमी,

केपे : ८५ मिमी,

काणकोण : ८२.२ मिमी,

पेडणे : ६८.४ मिमी,

मडगाव : ६२.४ मिमी,

जुने गोवे : ५२.४ मिमी,

फोंडा : ५२.४ मिमी,

साखळी : ५१.२ मिमी,

म्हापसा : ३५.३ मिमी,

मुरगाव : २८.८ मिमी,

पणजी : २७.९ मिमी,

दाबोळी : २४.१ मिमी.