मडगाव: गोव्यात पर्यटन हंगाम सुरू होताच पर्यटकांची गर्दी ठिकठिकाणी दिसू लागली आहे. अशातच आता गोव्यात इव्हेंट्‌सही सुरू झाले असून त्यासाठी समुद्रकिनाऱ्यांवर बेकायदेशीरपणे अतिक्रमण होऊ लागल्याच्या तक्रारी स्थानिकांकडून केल्या जाऊ लागल्या आहेत. केळशी येथेही असाच प्रकार घडला.

पर्यटकांना आकर्षित करण्यासाठी मनोरंजनाचे कार्यक्रमही आयोजित केले जात आहेत. मात्र हेच कार्यक्रम आता सर्वसामान्य गोवेकरांसाठी डोकेदुखी ठरताना दिसत आहेत. बीचवर होणाऱ्या संगीत रजनींमुळे स्थानिकांमध्ये नाराजीचे वातावरण आहे. दक्षिण गोव्यात केळशी समुद्रकिनाऱ्यावर दोन दिवसांपूर्वी असाच एक इव्हेंट साजरा करताना भरती रेषा कायद्याचे उल्लंघन केल्याचा आरोप स्थानिकांनी केला असून स्थानिक पंचायतीला हाताशी धरून असे बेकायदेशीर इव्हेंट्स सर्रास होत असल्याचा आरोप स्थानिकांनी केला आहे.

केळशीचे लोक आता आक्रमक झाले आहेत. मच्छीमारांनीही या कार्यक्रमावर आक्षेप घेतला आहे. केळशी किनारी आयोजित कार्यक्रमामुळे मासेमारीला धोका निर्माण झाल्याचा आरोप मच्छीमारांनी केला आहे. तर, स्थानिकांनी या कार्यक्रमाच्या आयोजनासाठी उभारलेल्या सेटअपमुळे नियमांची पायमल्ली होत असल्याचा आरोप केला आहे.

राष्‍ट्रीय हरित लवादाकडे प्रकरण नेणार

या कार्यक्रमाला विरोध करणाऱ्या स्थानिकांना अटक करण्याचा इशारा दिल्यानंतर काहीकाळ वातावरण तापले होते. संतप्त स्थानिकांनी याप्रकरणी राष्ट्रीय हरित लवादाकडे दाद मागणार असल्याचं स्पष्ट केलं आहे. किनाऱ्याच्‍या रक्षणासाठी आणि संवर्धनासाठी प्रयत्नशील असल्याचा दावा स्थानिकांनी करत अशा प्रकारच्या कार्यक्रमांना तीव्र विरोध दर्शवला आहे.