पणजी : राज्यातील बहुतेक टॅक्सींना डिजिटल मीटर बसविले आहेत. सध्या फक्त 50 टॅक्सी डिजिटल मीटर बसवण्याच्या प्रतीक्षेत आहेत. ज्या टॅक्सींना मीटर नसेल त्यांच्यावर कारवाई केली जाईल. वाहतूक खात्याकडे नोंद असलेल्या 11025 पैकी 9362 टॅक्सींना डिजिटल मीटर बसवले आहेत, अशी माहिती वाहतूक खात्याने मुंबई उच्च न्यायालयाच्या गोवा खंडपीठाला दिल्याने ‘टुर्स ॲण्ड ट्रॅव्हल्स असोसिएशन ऑफ गोवा’ने (टीटीएजी) सादर केलेली याचिका निकालात काढण्यात आली.

केंद्र सरकारने देशातील सर्व टॅक्सींना डिजिटल मीटरची सक्ती केल्यानंतरही गोव्यात त्याची अंमलबजावणी होत नव्हती. टॅक्सीचालकांनी भरमसाट भाडे आकारून पर्यटकांची सतावणूक केल्याने त्याचा परिणाम पर्यटन व्यवसायावर होत असल्याची याचिका ‘टीटीएजी’ने सादर केली होती. त्याची दखल घेत खंडपीठाने सरकारला टॅक्सींना डिजिटल मीटर बसवण्यासंदर्भात पावले उचलण्याचे निर्देश देताना त्याचा वेळोवेळी अहवाल सादर करण्यास सांगितले होते.

त्यामुळे टॅक्सी परवान्याची मुदत संपल्यानंतर डिजिटल मीटर बसविल्याशिवाय नूतनीकरण न करण्याचा निर्णय वाहतूक खात्याने घेतला होता. तसेच जे टॅक्सीचालक डिजिटल मीटर नसतानाही रस्त्यावर येतील, त्यांच्यावर कारवाई करण्याची मोहीम सुरू केल्यावर टॅक्सीचालकांनी मीटर बसवण्यास सुरवात केली होती.